Elordanyń ortalyq alańynda mektep jármeńkesi ótýde

ASTANA. 30 tamyz. QazAqparat - Búgin Astanada qalalyq alańda «Mektepke jol» aktsııasy aıasynda 40 kásipkerdiń qatysýymen mektep jármeńkesi ótedi. Onda mektep formasy, aıaq kıimder, keńse zattary, rıýkzaktar, oqýlyqtar men basqa da mektep jabdyqtary tómendetilgen baǵamen satylady.

«Búgin Astana qalasy ákimdiginiń qoldaýymen Almaty, Qaraǵandy jáne Shymkent qalalarynyń kásipkerleriniń qatysýymen mektep jármeńkesi ótkizilip jatyr. Ol Konstıtýtsııa kúnimen tuspa-tus kelip otyr. Kúnniń sýyǵyna qaramastan bári de belsendi qatysýda. Sonymen qatar, halyqqa zań konsýltatsııalaryn beretin qoǵamdyq qabyldaýlar jumys isteıdi. Ata-analar men jármeńkege qatysýshylar onda ózderin mazalaıtyn suraqtaryn qoıa alady. Jármeńke kezinde 5 qoǵamdyq tamaqtaný orny uıymdastyryldy», - dedi astana.kz saıtyna Balalar quqyǵyn qorǵaý basqarmasynyń bas mamany Larısa Temirlına.

Onyń aıtýynsha, jármeńkede mektep jabdyqtary 10%-25%, balalar kıimi 10%-50% jeńildikpen satylady.

«Kúnniń sýyǵyna qaramastan jármeńkege keldim. Jap-jaqsy ótip jatyr. Munda mektepke kerektiń bárin jeńildiktermen alýǵa bolady. Bul balany mektepke jınaýdyń keremet múmkindigi. Kontsert te jaqsy uıymdastyrylǵan. Búgin kún sýyq bolǵanymen adamdardyń kóńil kúıi jaqsy, is-sharaǵa qýana qatysyp júr», - dedi astana.kz saıtyna jármeńkege kelýshi Áıgerim Nyǵmetova.

Mektep jármeńkesi jyl saıyn oqý jylynyń qarsańynda ótkiziledi. Bıyl ol 24 jáne 30 tamyzda uıymdastyryldy.