Elordanyń bas dárigeri revaktsına jasatty

NUR-SULTAN. QazAqparat – Búgin qalalyq Qoǵamdyq densaýlyq saqtaý basqarmasynyń basshysy Tımýr Muratov qaıta ekpe alý úshin emhanaǵa keldi. Bul joly ol qazaqstandyq QazVac preparatyn saldyrtty, dep habarlaıdy QazAqparat qala ákimdigine silteme jasap.

Basqarma basshysy qaıta vaktsınatsııalaý kerektigin aıtty.

«Infektsııa men vaktsınatsııadan keıin ımmýnıtettiń álsireýi degen tabıǵı protsess bar. COVID-19 – juqpaly aýrý, odan ımmýnıtet qatty álsireıdi jáne uzaq ýaqyt qalyptaspaıdy. Ózińizdi ınfektsııadan qorǵaý úshin revaktsınatsııa jasaý kerek. Sonymen qatar, revaktsınatsııa bir ınektsııa arqyly júzege asyrylady, bul sizdiń ımmýnıtetińizdi uzaq ýaqyt saqtaýǵa múmkindik beredi», - dedi T.Muratov.

Vedomstvo basshysy bul joly nege otandyq vaktsınany tańdaǵanyn túsindirdi.

«Birinshi ret, aqpan aıynda men Spýtnık vaktsınasyn aldym. Ol kezde ekpeniń bir-aq túri qoljetimdi bolatyn. Reseılik vaktsınadan keıin QazVac nemese Sinofarm Vero Sell ekpelerine ruqsat etilgendikten tańdaýym álbette ózimizdiń vaktsnamyzda úsedi. QazVac klınıkalyq synaqtardyń qajetti kezeńderinen ótti jáne tájirıbe kórsetkendeı, tıimdiligin dáleldedi» , - dep tolyqtyrdy basqarma basshysy.

Sondaı-aq, ol qaıta ekpe almaǵan jaǵdaıda aǵzaǵa qandaı qaýip tónýi múmkin ekendigin qozǵap ótti.

«Vırýs mýtatsııaǵa ushyraıdy. Onyń qanshalyqty aýyr túrde ótetinin eshkim bile almaıdy. Eger ekpeni qazir almaı vırýs juqtyrar bolsaq, aýrý óte aýyr ótýi múmkin», - dep túsindirdi vedomstvo basshysy.

Búgingi kúni revaktsınatsııa naýqany bastalǵannan beri qala boıynsha medıtsınalyq qyzmetkerler, sanıtarlyq-epıdemıologııalyq qyzmet jáne kúsh qurylymdarynyń qyzmetkerleri vaktsınany qaıta alyp jatyr.

Jalpy elordada vaktsınanyń birinshi komponentin 467 myńnan astam adam alǵan. Pfizer vaktsınasyn 5 myńǵa jýyq astanalyq aldy.