Elordanyń «Alma» sýpermarketinen qaýipti azyq-túlik pen oıynshyqtar tabyldy

 ASTANA. QazAqparat - Astana qalasynyń qoǵamdyq densaýlyqty qorǵaý departamenti azyq-túlik ónimderine monıtorıng júrgizý barysynda  «Alma» sýpermarketinen qus etinen jasalǵan qaýipti ónimderdi anyqtady, dep habarlaıdy "Elorda Info" vedomstvonyń baspasóz qyzmetine silteme jasap.

Atalǵan qaýip ónimniń markasyndaǵy óreskel buzýshylyqpen baılanysty: tutynýshyǵa arnalǵan etıketkada óndirýshi men ımporter týraly aqparat kórsetilmegen, daıyndalǵan ýaqyty men paıdalaný merzimi jazylmaǵan, aqparat memlekettik tilde kórsetilmegen jáne EAEO belgisi, ıaǵnı Eýrazııalyq ekonomıkalyq odaqtyń baǵalaý protsedýrasynyń tehnıkalyq reglamentinen ótkenin rastaıtyn belgi bolmaı shyqty.

Qus etinen jasalǵan tez buzylýǵa beıim, shyǵarylǵan ýaqyty men paıdalaný merzimi kórsetilmegen ónimder ınfektsııalyq aýrýlardyń taraýy men azyq-túlikten ýlanýǵa ákelip soǵýy múmkin.

Sondaı-aq sýpermarkettegi tez buzylatyn kondıterlik ónimderge júrgizilgen tekserý kezinde «Praga» bıskvıtti tortynda (óndirýshi -  «Glamour Product» (Astana) mıkrobıologııalyq kórsetkishterdiń normadan kóp ekeni jáne ashytqynyń 12 ese kóp qoldanylǵany belgili boldy. Al markileýge kelgende daıyndaýshy men onyń ornalasqan jeri jazylmaǵan.

Anyqtalǵan mıkrobıologııalyq zattar ónimdi saqtaý, tasymaldaý, ólsheý men satý kezinde saqtalýǵa tıis talaptardyń oryndalmaǵanyn dáleldep otyr. 

Buǵan qosa, 2018 jyldyń 27 naýryzynda «Alma» sýpermarketinde satyp alynǵan  «ARDANA Girl» taýar belgisiniń «Sý perisi qýyrshaǵy» men «Kentavr qýyrshaǵynda» shyǵarýshy men ımporter týraly aqparat, buıymdy paıdalaný men saqtaý sharttary týraly jadynama, quramy men paıdalaný merzimi týraly aqparat joq.

Osyǵan oraı Astana qalasynyń qoǵamdyq densaýlyqty qorǵaý departamenti turǵyndarǵa azyq-túlik pen ónimderdi tańdaý kezinde markadaǵy jazbany muqııat tekserý kerektigin eskertedi. Markileýde qatesi bar ónim turǵyndardyń ómiri úshin qaýipsiz emes.

Foto: nsdea.com