Elordamyzdyń kórkeıýine bizdiń de qosqan úlesimiz bar – qurylysshy

ASTANA. KAZINFORM – 10 tamyz – elimizde Qurylysshylar kúni. Osy merekede el ıgiligi úshin ter tógip júrgen sala mamandarynyń eńbegi erekshe atap ótiledi. Solardyń biri tehnıkalyq qadaǵalaý sarapshysy – Serikbaı Ámirjanov. 

Serikbaı Ámirjanov «Qazqurylysjúıesi» JShS-ine 2008 jyly elektrık retinde kelgen. Osy ýaqyt ishinde ol qurylys salasynyń barlyq qyr-syryn meńgergen bilikti mamanǵa aınaldy.

– «Qazqurylysjúıesine» kelgende 39 jasta edim, sol kezde kompanııadaǵy eń jas qyzmetkerdiń biri boldym. Qurylys salasynda 40-50 jyl eńbek ótili bar, tis qaqqan aǵalar meni óz qamqorlyǵyna aldy. Tájirıbesin bólisti, baǵyt-baǵdar berdi. Al men óz kezegimde olarǵa jańa tehnologııalardy kompıýter men elektrondyq poshtany paıdalanýdy úırettim, - dep eske alady Serikbaı Muqumuly óziniń tehnıkalyq qadaǵalaý salasyndaǵy alǵashqy jyldaryn. 

Búginde ol ózi de jastarǵa tálimger. Jańa kelgen qyzmetkerlerdi kásibı baǵytqa beıimdeıdi, mamandyqtyń qyr-syryn úıretedi. Tehnıkalyq qadaǵalaý sarapshysyna kúrdeli mindet júkteledi: qurylys sapasyn, qoldanylǵan materıaldar men tehnologııalardyń jobalyq qujattama men qurylys normalaryna sáıkestigin baqylaý kerek. Bul maman qurylys protsesiniń barlyq kezeńine qatysady – jobalaý aldyndaǵy daıyndyqtan bastap, nysandy paıdalanýǵa berýge deıin qurylys ortasynda júredi. Nysannyń ýaqytyly aıaqtalýy, aqaýlardyń anyqtap, ony joıý da sarapshynyń baqylaýynda.

– Jumystyń baǵyty tehnıkalyq bolǵanymen, óte qyzyq ári shyǵarmashylyqqa toly. Eń bastysy, halyq ıgiligi úshin jumys istep jatyrmyz. Bul sala maǵan unaıdy. Astananyń qurylysyna bizdiń de qosqan úlesimiz bar ekenin maqtanyshpen aıtamyn. Ujymymyz da kásibı ári uıymshyl, - deıdi Serikbaı Ámirjanov. 

Súıikti isin jan tánimen atqaratyn maman bos ýaqytyn otbasyna jáne týystaryna arnaıdy eken. Serikbaıdyń otbasy – úlken, ózi de, jary da kópbalaly otbasynda tárbılengen. Serikbaıdyń ata-anasy on balany ósirip jetkizse, jary toǵyz aǵaıyndy. 

– Óte aralas-quralas otbasymyz. Bir sát te bos ýaqytymyz bolmaıdy. Jyl boıǵy kúntizbe – týǵan kún, toı, qudalyq, kómektesý kerek bolatyn sharýalarmen tolyp turady. Birde bizdi qonaqqa shaqyrady, birde biz shaqyramyz. Qyzymyz da sondaı qamqor bolyp ósti, - deıdi Serikbaı Muqumuly. 

Keıipkerimizdiń hobbıi – saıahattaý. Onyń armany – jer sharyn aınalyp shyǵý. 

– Shetelge issaparmen nemese demalysqa shyqqanda, elge oralǵan saıyn Qazaqstanǵa degen mahabbatym arta túsedi. Halqymyzdyń, dástúrimizdiń ózi – úlken baılyq. Qurylysshylar kúni qarsańynda áriptesterime jáne otandastaryma zor densaýlyq, rýhanı jylýlyq, beıbit aspan men órkendeý tileımin. Árdaıym dástúrimizdi dáriptep, qonaqjaılyǵymyzdy joǵaltpaı, bir-birimizge qoldaý kórsetip, ata-baba ósıetin umytpaıyq. Eldi birge kórkeıtip, baqytty bolashaq quraıyq, - dep júrekjardy tilegin bildirdi Serikbaı Ámirjanov.

Buǵan deıin, Qazaqstanda kásibı merekeler tizbesi jańartylǵanyn jazǵanbyz.  

Sonymen qatar ónerkásip pen qurylys salasynda qandaı jańa mamandyqtar paıda bolǵanyn habarlaǵanbyz.