Elordalyq stýdent úlken sandardy kalkýlıatorsyz esepteý formýlasyn tapty

ASTANA. QazAqparat - L.N.Gýmılev atyndaǵy Eýrazııa ulttyq ýnıversıtetiniń ІІ kýrs stýdenti úlken sandardy kalkýlıatorsyz esepteýdiń jańa formýlasyn oılap tapty, dep habarlaıdy QazAqparat Ǵylym jáne joǵary bilim mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, búginde jas ǵalymnyń qorjynynda 33 túrli formýla bar. Daryndy stýdent aldaǵy ýaqytta óz eńbegin patenttep, shákirt tárbıeleýdi armandaıdy.

Aqparattyq tehnologııalar fakýltetiniń bilim alýshysy Bek Musabekovtyń matematıka salasyna qyzyǵýshylyǵy mektep qabyrǵasynda oıanǵan. Talantty jas kvadrat jáne kýb ádisterimen formýlalardy 9-shi synypta alǵash ret oılap tapty.

«Túbir astynan jýyqtap tabý» amalyn baǵan jáne kvadrat arqyly sheshý de - onyń mekteptegi eńbeginiń jemisi. Naqty ǵylymǵa qyzyqqan stýdent izdenimpazdyǵynyń arqasynda úlken sandardy kalkýlıatordyń kómeginsiz esepteýge bolatyn formýla jasap shyǵardy.

«Kalkýlıator qoldaný múmkindigi joq barlyq jerde, tipti emtıhanda da meniń formýlammen esepter erkin shyǵarylady. Onyń ústine bul – ýaqyt únemdeýge de úlken múmkindik. Endi osy formýlalarymdy patenttep alǵym keledi. Meniń oılap tapqan formýlamdy oqý baǵdarlamasyna kirgizýge bolady dep oılaımyn. Aldaǵy ýaqytta matematıkadan shákirt tárbıelep, oqýshylarymdy olımpıadalarǵa daıyndasam degen nıetim bar», - dep óziniń jospary týraly aıtty.

Búginde EUÝ jas ǵalymynyń qorjynynda kalkýlıatorsyz esepteýdiń 33 túrli formýlasy bar. Onyń 29-yn mektep qabyrǵasynda shyǵarsa, 4-eýin ýnıversıtette júrip oılap tapqan. Stýdent úlken sandardy kalkýlıatorsyz esepteýdiń budan da ońaı formýlalaryn izdeýdi jalǵastyrmaq.

Bek Musabekov óziniń qabiletin 2021 jyly «Daryndy jas ǵalym» respýblıkalyq ǵylymı-jobalar baıqaýynda ortaǵa salyp, «Daryn» atalymy boıynsha top jardy. EUÝ stýdenti «QR táýelsizdigine 30 jyl» merekelik tósbelgisimen de marapattalǵan.

Foto: t.me/gylym_jogary_bilim