Elordalyq sportshylar qysqy Ýnıversıadaǵa daıyn

ASTANA. QazAqparat - Konkımen júgirý sportynan halyqaralyq dárejedegi sportshy Dmıtrıı Morozov pen Qazaqstannyń sport sheberi Nadejda Sıdelnık elorda namysyn qorǵamaq.

Otandyq sportshylardyń daıyndyǵy jóninde Astana qalasynyń konkımen júgirý sportynan bas bapkeri Vladımır Kostın aıtty, dep jazady Astana ákimdiginiń saıty.

«Ótken Ýnıversıadada bul sport túrinen jarys ótken joq. Bizdiń sportshylar dodany taǵatsyzdana kútýde. Dmıtrıı men Nadejda eń jas ári bolashaǵynan úmit kúttiretin sportshylar, qazir olar shetelde jalpy komandalyq jıynda jattyǵýda. Dál babyndaǵy sportshylar, saıysqa ázir. Olar sátti óner kórsetedi dep úmittenemin»,- dedi Vladımır Kostın.

Sondaı-aq astanalyq sportshylar shaıbaly hokkeıde de óner kórsetpek.

29 qańtarda Almatyda bastaý alatyn XXVIII Dúnıejúzilik qysqy ýnıversıadaǵa 12 sport túrinen 168 otandyq sportshy qatyspaq.