Elordalyq polıtseıler bank alaıaqtarynyń qalaı aldaıtynyn túsindirdi
Vedomstvonyń málimetinshe, alaıaqtar kelesi júıe boıynsha jumys isteıdi: alaıaqtardyń bir toby bank kartalaryn ustaýshylarǵa telefon arqyly qońyraý shalyp, Ulttyq bankpen birlesip, nesıe rásimdeýge tyrysyp jatqan alaıaqtardy áshkereleý boıynsha is-sharalar júrgizip jatqanyn túsindiredi. Olar polıtsııa men prokýratýra qyzmetkerleriniń derekterin ınternettegi bos kózderden alady. Ary qaraı, basqa alaıaqtar habarlasyp, ózderin bank qyzmetkerleri etip tanystyrady jáne alaıaqtyq áreketterin rastaıdy. Áńgime barysynda olar quqyq qorǵaý organdarymen jáne banktermen birlesip alaıaqtardy anyqtaý boıynsha operatsııa júrgizilip jatqanyn habarlaıdy.
«Osylaısha azamattardyń senimine kirýge tyrysqan olar banktik derektemeler men SMS-kodtardy alýdy kózdeıdi. Dál osy málimetterdi alý úshin alaıaqtar karta ustaýshylarǵa qońyraý shalady, óıtkeni bul málimetter ınternet-bankıngke, ıaǵnı shottarǵa qol jetkizýge qyzmet etedi. Keıbir alaıaqtar toby qońyraý soǵyp áńgimelesip jatqanda basqalary ınternet-bankıng arqyly shottarǵa qol jetkizýge tyrysady jáne SMS kodtaryn kútedi», - dep jazdy departamentten.
Sondaı-aq alaıaqtardyń taǵy bir basqa toby ózderin bank qyzmetkerleri etip tanystyryp, áldebireýler onyń atyna nesıe rásimdeýge tyrysyp jatqanyn aıtyp, alaıaqtyq áreketterdiń aldyn alý maqsatynda qolda bar aqshany rezervtik nemese saqtandyrý shotyna aýdarýdy suraıdy. Al jınaqtar bolmasa, onda aýdarymnan keıin joıylatyn nesıe rásimdeý qajet ekenin aıtady.
«Sóılesken kezde jeke basyn rastaý syltaýymen, olar jeke jáne karta derektemelerin, SMS-parolderdi aıtýdy suraıdy. Internet-bankıngti qalaı paıdalanýdy bilmeıtinderge alaıaqtar AnyDesk qosymshasyn júkteýdi usynady. Budan ári osy qosymshalardan logın men paroldi alyp, qaskúnem qurylǵyǵa qashyqtan qol jetkizedi, ıaǵnı basqa eldiń aýmaǵynda bola otyryp, alaıaq óz qurbanynyń uıaly telefonyn tolyq baqylaı alady. Atap aıtqanda, sms jibere alady, mobıldi bankıngterdi paıdalana alady jáne túrli operatsııalardy, sonyń ishinde kredıtterdi resimdeýdi jáne aqsha qarajatyn odan ári aýdarýdy júrgize alady», - dep túsindirdi vedomstvo ókilderi.
Olardyń málimetinshe, kóbinese jeke azamattar alaıaqtardyń aıtýymen nesıelerdi ózderi rásimdeıdi, bul rette adamnyń bıometrııalyq derekterin oqý arqyly tekserýden ótedi. Alaıaqtardyń qurbandary bankterdiń bólimshelerinde nesıe rásimdegen jaǵdaılar bar, al menedjerlerge kúmándi áńgime týraly habarlamaǵan. Nesıelerdi rásimdegennen keıin olardy ózderi sheteldik shottarǵa jiberedi.
«Alaıaqtar qońyraý shalý úshin qazaqstandyq azamattardyń abonenttik nómirlerin qaıtalaýǵa múmkindik beretin SIP-telefonııany baǵdarlamalyq qamtamasyz etýdi paıdalanady. Sondyqtan telefon qońyraýynyń qosylý kózin baqylaý úshin ýaqyt qajet. Osyndaı shemalardan elordalyq polıtsııaǵa 1000-nan astam habarlama men shaǵym tústi. 200 derek boıynsha QK 190-babymen (Alaıaqtyq) sotqa deıingi tergeý bastaldy. Jalpy shyǵyn 250 mln teńgeden asady. Negizinen mundaı shemaǵa zeınetkerler jáne zeınet jasyndaǵy adamdar túsip jatady», - dep atap ótken habarlamada.
Internet-alaıaqtardyń qurbany bolmas úshin Nur-Sultan qalasynyń polıtsııa departamenti belgili bir saqtyq sharalaryn saqtaýdy usynady:
- Eger sizge osyndaı qońyraý tússe, eshqandaı jaǵdaıda SMS-kodty bermeńiz! Áńgimeni úzip, banktiń koll-ortalyǵynyń resmı telefondary boıynsha aqparatty naqtylańyz.
- Mobıldi bankıng qosymshalaryna kúrdeli parolderdi ornatyńyz, olardy jıi ózgertip turý kerek.
- Barlyq qaýipsizdik sharalaryn qosý qajet, 3D - Secure, sizdiń telefon nómirińizge SMS-habarlama jibermeı eshqandaı tólem ótpeıdi. Operatsııalardy júrgizý úshin osy kodty engizý arqyly ǵana rastaı otyryp, siz qandaı da bir tólem operatsııasyn júrgize alasyz. Sondyqtan mundaı qaýipsizdik ádisterin qosý kerek.
