Elordalyq eriktiler qoldaryna kúrek alyp, kóshege shyqty

ASTANA. QazAqparat – Elordalyq eriktiler aýlalardy qardan tazartý aktsııasyn jalǵastyrdy, dep habarlaıdy QazAqparat Astana qalasy ákimdiginiń resmı saıtyna silteme jasap.

Eriktiler jalǵyzbasty, qart jáne basqa da muqtaj adamdarǵa úı mańyndaǵy aýmaqtardy qardan tazartýǵa kómektesti. Aýqymdy aktsııaǵa 130-ǵa jýyq adam qatysty. Olar – eriktiler, belsendiler, «Jas sarbaz» áskerı-patrıottyq qozǵalysynyń tárbıelenýshileri jáne jastar uıymdarynyń ókilderi.

«Biz osyndaı is-sharalarǵa únemi qatysamyz. Volonterlik kómek eshqashan artyq bolmaıdy, ásirese qart adamdar úshin», - deıdi «Jas sarbaz» ÁPQ Astana qalalyq fılıalynyń tóraǵasy Ashat Nalshybek.

Іs-sharany Astana qalasy Baıqońyr aýdany ákiminiń apparaty, «Astana jastary» resýrstyq ortalyǵy jáne elordalyq Jastar saıasaty máseleleri basqarmasy uıymdastyrdy. Barlyq qatysýshylar qajetti qural-jabdyqtarmen qamtamasyz etildi.

Aıta ketsek, «Qazgıdromet» RMK derekteri boıynsha 6 qańtarǵa qaraǵan túni astanada jaýyn-shashyn mólsheri – 5,2 mm, al qardyń bıiktigi – 39 sm boldy. 2023 jylǵy 1 qańtarmen salystyrǵanda (0,8 mm) jaýyn-shashyn mólsheri 6 esedeı artqan.

Qys mezgili bastalǵaly kommýnaldyq qyzmetter qaladan 113 myńnan astam júk kóligine teń nemese 1,4 mıllıon tekshe metrden astam qar shyǵardy. Olar keshki jáne túngi ýaqyttarda da kúsheıtilgen rejımde jumys istep jatyr.

Foto: gov.kz