Elordalyq emhanalar MÁMS qosýǵa qanshalyqty daıyn

NUR-SULTAN. QazAqparat – Mindetti áleýmettik medıtsınalyq saqtandyrý júıesiniń iske qosylýyna sanaýly ǵana kúnder qaldy. MÁMS júıesiniń engizilýi medıtsınalyq qyzmetterdiń sapasy men qoljetimdiligin arttyrýǵa baǵyttalǵany týraly aıtylyp kele jatyr. Onyń medıtsınalyq uıymdardyń jumysyna qalaı áser etetindigi týraly Nur-Sultan qalalyq №4 emhanasynyń sarapshy dárigeri Nurjan Qapametov aıtyp berdi, dep habarlaıdy QazAqparat tilshisi.

«Bizdiń emhana MÁMS júıesin iske qosýǵa belsendi túrde daıyndalýda. Biz kórsetiletin qyzmetterdiń sapasyn arttyrý boıynsha jumys júrgizip jatyrmyz, «medıtsınalyq qyzmetker - patsıent» baılanysyn tereńdetip úıretetin sabaqtar ótkizýdemiz. Medıtsınalyq deontologııa máselelerin qarastyrýdamyz, ár túrli jaǵdaılardyń aldyn alatyn tetikter men shaǵymdardy taldadyq. Deontologııa – bul medıtsınalyq qyzmetkerlerdiń tıisti minez-qulqy týraly ilim. ıAǵnı, dárigerler, medbıkeler ózin durys ustaýy, patsıenttiń aıyǵýy úshin jaıly jaǵdaı jasaýy. Ol medıtsına qyzmetkerleriniń áreketterinen kórinedi, soǵan den qoıyp, oqyp úırenýdemiz», - dedi Nurjan Qapsametov.

Onyń aıtýynsha, emhana dárigerleri MÁMS júıesine muqııat daıyndalyp jatyr, óıtkeni eger emdeý sapasynyń nasharlyǵyna baılanysty shaǵymdar tússe,onda sol medıtsınalyq uıymǵa aıyppul salynady.

«Eger belgili bir naýqasqa qatysty shaǵymdar bolsa, onyń emdelýine aqy tólenbeıdi. Medıtsınalyq saqtandyrýdy engizse de, tegin medıtsınalyq kómektiń kepildik berilgen kólemi (TMKKK) saqtalady, ol MÁMS-pen teń dárejede qoldanylady. TMKKK-ǵa barlyq áleýmettik mańyzy bar aýrý túrleri kiredi. Ol 25 topqa bólingen. Mysaly, týberkýlez, vırýstyq gepatıt, qant dıabeti, arterııalyq gıpertenzııa», - dedi sarapshy-dáriger.

Ol sondaı-aq densaýlyq saqtaý salasyn tsıfrlandyrý boıynsha júrgizilip jatqan jumystar týraly da aıtyp ótti.

«Búginge deıin patsıentter «Damý Med» mobıldi qosymshasyn qoldanyp júrdi, endi oǵan «Keshendi medıtsınalyq aqparattandyrý júıesi» engizildi. Bul mobıldi qosymsha patsıentterge smartfon arqyly kez kelgen jerge ózine qolaıly ýaqytta dáriger qabyldaýyna jazylýǵa múmkindik beredi. Budan bólek mobıldi qosymshada ózińizdiń «jeke kabınetińizge» kirip, taldaý nátıjelerin qaraýǵa bolady. Sondaı-aq «Jeke kabınetten» kartańyzdy kórip, aýrýyńyz jaıly da bile alasyz. Osylaısha, biz qaǵaz kartadan qutylamyz. Burynǵydaı qaǵaz kartany tasyp júrýdiń qajettiligi joq», - dep atap ótti maman.

Onyń aıtýynsha, emhananyń tirkeý bóliminde HQKO mamany patsıentterge barlyǵyn túsindirip, smartfonǵa qosymshany qalaı júkteıtinin, ETsQ kómegimen Egov arqyly emhanaǵa qalaı tirkeletinin kórsetip turady.

Eske sala keteıik, 2020 jyldyń 1 qańtarynan bastap Qazaqstanda MÁMS iske qosylatyn bolady.

Avtor Aqbota Kúzekbaı