Elordalyq áýejaıdy jóndeýge nege memlekettik bıýdjetten qarjy bólinedi – komıtet tóraǵasynyń jaýaby

ASTANA. QazAqparat – Úkimet otyrysynan keıin BAQ ókilderiniń saýalyna jaýap bergen Azamattyq avıatsııa komıtetiniń tóraǵasy Nursultan Nazarbaevtyń halyqaralyq áýejaıy nege memlekettik bıýdjet qarajaty esebinen jóndeletinin túsindirdi, dep habarlaıdy QazAqparat tilshisi.

«Astana áýejaıy memleket menshiginde. Tıisinshe, ushý-qoný jolaǵyn jóndeý memlekettik bıýdjet qarajaty esebinen josparlanyp otyr. Áýejaı tarıfteri qajetti shyǵyndardy jabady. Degenmen jerústi ınfraqurylymyn jańartý úshin qosymsha qarajat qajet. Óıtkeni, bizde tarıfter salystyrmaly túrde arzan. El áýejaılaryndaǵy tarıfter TMD elderi boıynsha tómen», - dep túsindirdi Talǵat Lastaev.

Komıtet tóraǵasy BAQ ókilderiniń saýalyna jaýap bere otyryp, áýejaıdy jóndeýge qajet 20 mlrd teńgeniń barlyǵy bıýdjet qarajatynan bólinetinin málimdedi.

Buǵan deıin elordalyq áýejaı jóndeýge baılanysty ýaqytsha jabylatynyn habarlap edik.