Elordalyq 5 mln teńgesin alaıaqqa bergenin bilmeı qaldy

NUR-SULTAN. QazAqparat – Elordada 60 jastaǵy qala turǵyny alaıaqqa jem bolyp, 5 mln teńgeden astam qarajatynan aıyrylyp qaldy, dep habarlaıdy QazAqparat tilshisi.

«Polıtsııaǵa qala turǵyny shaǵymdanyp, telefon arqyly bank qyzmetkerimin dep habarlasqan beıtanys adamnyń aldaý arqyly 5 mln 250 teńge aqsha qarajatyn alyp qoıǵandyǵyna aryz túsirdi. Esil aýdandyq PB krımınaldyq polıtsııa qyzmetkerleriniń jedel izdestirý is-sharasy barysynda Almaty qalasynda alaıaqtyq jasaý kúdigimen 31 jastaǵy jigit ustaldy», - dep atap ótedi Nur-Sultan qalalyq polıtsııa departamentinen.

Qazirgi ýaqytta polıtsııa qyzmetkerleri qaskúnemniń ózin banktiń qaýipsizdik qyzmeti qyzmetkerimin dep tanystyrǵanyn, zardap shegýshige uıaly telefondaǵy qosymshasynan kúdikti operatsııa júrgizilgendigin aıtyp, sendirgenin anyqtady. Osydan keıin alaıaq zardap shegýshige eski qosymshasyn buǵattap, jańasyn ashýǵa keńes bergen. Áńgimelesý barysynda jigit sypaıylyq tanytyp, áıeldiń senimine kirgen. Jańa qosymsha ashylǵannan keıin alaıaq zardap shegýshiniń barlyq aqshasyn KIWI ámııanǵa aýdaryp alǵan.

«Kúdiktiden 10 bank kartasy tárkilendi. Ustalǵan adam Nur-Sultan qalalyq PD ýaqytsha oqshaýlaǵyshyna qamaldy. Atalǵan fakti boıynsha QR QK 190 baby 3 tarmaǵymen sotqa deıingi tergeý júrgizilip jatyr. Qazirgi ýaqytta qylmysqa qatysy bar ózge de adamdardy tabý, alaıaqtardan basqa da zardap shekkenderdi anyqtaý baǵytynda tergeý is-sharalary qolǵa alyndy», - dep atap ótedi departamentten.