Elordalyq mamandar APV-ǵa qarsy ekpe týraly: Ázirge keri áseri baıqalmady
ASTANA. KAZINFORM – Qyrkúıek aıynyń ortasynda Qazaqstanda jatyr moıny obyrynyń negizgi qozdyrǵyshy – adam papılloma vırýsyna (APV) qarsy qyzdardy jalpy vaktsınalaý bastaldy.
Elimizde osy qaýipti ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajettigine qatysty bizdiń agenttik sholý jasaǵan edi. Tolyǵyraq siltemege ótip tanysýǵa bolady.
Búgin elordanyń Qoǵamdyq densaýlyq basqarmasynyń uıymdastyrýymen 11-13 jastaǵy qyzdardy adam papıllomasy vırýsyna (APV) qarsy ekpe egý sharalary boıynsha baspasóz týry uıymdastyryldy.
«Jyl basynda jatyr moıny obyrynyń negizgi qozdyrǵyshy – adam papılloma vırýsyna (APV) qarsy 11 jasqa tolǵan qyzdardy jalpy vaktsınalaý týraly Úkimet qaýlysyna ózgerister engizildi. Qaýlyda josparǵa sáıkes profılaktıkalyq vaktsınatsııa týraly aıtylǵan, oǵan sáıkes atalǵan vırýstan qorǵaný maqsatynda 11 jasqa tolǵan qyzdarǵa ekpe egý josparlanǵan. Bul sheshim elimizde áıelder arasynda kúnine kem degende 2 onkologııalyq derttiń anyqtalýymen baılanysty bolyp otyr. Búginde atalǵan vaktsınany álemniń 35 eli qoldanyp otyr. Sonyń arqasynda AQSh, Avstralııa elderinde adam papılloma vırýsynyń taralýy tómendegenin kórsetip otyr», - dedi Astana qalasy sanıtarlyq-epıdemıologııalyq baqylaý departamenti basshysynyń orynbasary Janna Pralıeva baspasóz týry barysynda.
Onyń aıtýynsha, búginde elordada 11 jasqa tolǵan 15 myń jas qyz jetkinshek atalǵan indetke qarsy vaktsına alady degen jospar bar. Qazirdiń ózinde 3 myńǵa jýyq jasóspirim qyz APV-ke qarsy ekpe alǵan.
«Ázirge vaktsınadan keıingi keri áseri baıqalmady, onyń ústine ata-analar qaýipsizdik maqsatyndaǵy ekpege qatysty qarsylyq tanytyp jatqan joq», - deıdi maman.
Elorda turǵyny, kópbalaly ana Gúldana Tasmaǵambetova balalardyń qaýipsizdigi úshin atalǵan vaktsınany egý kerektigin aıtyp otyr.
«Men bes balanyń anasymyn, ózim 2009 jyly aqyly túrde vaktsına alǵam, sebebi papılloma vırýsynyń qaýpi týraly, ıaǵnı jatyr moıny obyrynyń zalaly týraly jaıtpen tanyspyn. Sondyqtan indettiń aldyn aldym. Vaktsına bedeýlikke alyp keledi, sábı kóterý múmkin emes degen bos áńgime, shúkir, bes balanyń anasymyn. Onyń ústine bul praktıka álemniń damyǵan elderinde qoldanylyp keledi, onyń ústine bizdiń elimizde vaktsına tegin. Búgin qyzymdy vaktsına egýge alyp keldim», - deıdi ol.