Elordaǵa qarap otyryp ózim de tań qalamyn - Nursultan Nazarbaev

NUR-SULTAN. QazAqparat - «Habar» telearnasyna bergen suhbatynda QR Tuńǵysh Prezıdenti - Elbasy Nursultan Nazarbaev elordanyń Alataýdan Arqaǵa qalaı kóshirilgendigi jaıynda aıtty, dep habarlaıdy QazAqparat tilshisi.

«Elordany Alataýdyń baýraıynan Arqanyń tósine alyp kelý de ońaı sharýa bolǵan joq. Eshbir memleket ony jasaǵan da joq. Mońǵoldyń premer-mınıstrimen osynyń aldynda kezdestim. Olar da Ulan-Batyrdyń túbinde qala salaıyn dep jatyr. Bizdiń tájirıbemizdi úırengisi keledi», - dedi Elbasy.

N.Nazarbaev Almatynyń Aqmolaǵa kóshirilýine qarsy bolǵan adamdardyń da kóp bolǵanyn aıtty.

«Sebebi, senbedi, jaǵdaı qıyn, Úkimette aqsha joq edi. Bul qalany qalaı salasyń, Almatydan sý shyqty ma? - degen kóp áńgimeni estidim. Biraq bul da bizdiń geosaıasatymyzdyń sharýasy edi. Ony túsingen adam túsinýi kerek. Bul jerde qazaq joq bolatyn. Qazir Qazaqstandaǵy eń qazaqı qala - Nur-Sultan qalasyna aınaldy», - dedi N.Nazarbaev.

Elbasy elordamyzdyń Arqa tósine aýysýymen ońtústiktegi qalyń qazaqtyń kóshi de soltústikke bet burǵanyn atap ótti.

«Men ózim keıde mynaý qalaǵa qarap otyryp, istelgen jumysty qarap otyryp, ózime ózim tań qalamyn. Óz kózime ózim senbeımin. Qalaı qoldan keldi, qalaı boldy? Bul meniń býynymnyń istegen sharýasy osy. Eldiń qoldaýyna, osylaı jiger bergenine rızamyn», - dep qosty QR Tuńǵysh Prezıdenti.