Elordadan urlanyp, jumysqa jegilgen jasóspirim - polıtsııa túsinikteme berdi

NUR-SULTAN. QazAqparat – «NeMolchıKZ» qoǵamdyq qoryna 16 jastaǵy jasóspirim ózin elordadan kúshtep alyp ketip, aýylda jumys isteýge májbúrlegeni týraly habarlama joldaǵan. Jaǵdaıǵa qatysty polıtsııa departamenti tekserý júrgizip, jasóspirim qazir Nur-Sultan qalasynda, óz úıinde aman-esen ekenin málim etti, dep habarlaıdy QazAqparat tilshisi.

«16 jastaǵy baladan alańdaýshylyq týǵyzǵan habarlama tústi. Ol ózin Nur-Sultan qalasynan urlap alyp ketip, aýylǵa aparyp, kúsh qoldana otyryp, jumysqa májbúrlegenin málimdedi», - dep jazdy «NeMolchıKZ» qoǵamdyq qorynyń basshysy Dına Tańsári.

Dına Tańsári bul habarlamany tekserýdi surap, Іshki ister mınıstrliginiń «WhatsApp» messendjerine ótinish jibergen. Habarlamada bala óziniń meken-jaıy men aty-jónin kórsetpegen. Tek fotosýretin joldaǵan.

Polıtsııa departamentiniń baspasóz qyzmeti atalǵan fakti boıynsha tekserý júrgizilip jatqanyn habarlady. Tártip saqshylary jasóspirimmen baılanysqa shyqqan.

«Áleýmettik jelilerge monıtorıng júrgizý barysynda elordalyq jasóspirimdi aýylda jumys isteýge májbúrlegeni týraly jarııalanym anyqtaldy. Polıtsııa qyzmetkerleri kámeletke tolmaǵan balanyń qazir Nur-Sultan qalasynda óz úıinde jáne onyń aman-esen ekenin bildi. Mán-jaıdy tekserý barysynda habarlama taratqan balanyń anasy jazǵy demalysta ulyn Shyǵys Qazaqstan oblysyndaǵy aýylǵa týystaryna jibergenin túsindirgen. Jasóspirimge ol jer unamaǵandyqtan, ol bul týraly áleýmettik jelilerge jazǵan. Balanyń anasy aryz-shaǵym túsirýden bas tartty», - dep túsinikteme berdi polıtsııa departamentiniń baspasóz qyzmeti.