Elordadaǵy Prezıdenttik klınıkada zamanaýı emdeý-dıagnostıka blogy ashyldy

ASTANA. QazAqparat – QR Prezıdenti Іs basqarmasynyń Medıtsına ortalyǵynda zamanaýı emdeý-dıagnostıka blogy jumys isteı bastady, dep habarlaıdy QazAqparat tilshisi.

Búgin ashylǵan bólimde pýlmonologııa, nefrologııa, gastroenterologııa, endokrınologııa, nevrologııa, revmatologııa jáne kardıologııa boıynsha kúrdeli aýrýlarǵa shaldyqqan naýqastardy emdep, ońaltady.

Sondaı-aq Medıtsına ortalyǵy janynan aldaǵy ýaqytta pýlmonologııa ortalyǵyn ashý josparlanǵan.

«640-kompıýterlik tomografııanyń Qazaqstan jáne Ortalyq Azııa boıynsha teńdesi joq. Apparat zertteýdi 1,5-2 ese tezdetedi. Osylaısha standartty zertteýler 15 mınýtqa, al mamandandyrylǵan zertteýler ýaqyty 30 mınýtqa deıin qysqarady. Bul patsıentter úshin qoljetimdilikti arttyra túsedi. Atalǵan kompıýterlik tomografııanyń kómegimen jylyna 12 myń zertteý júrgizý múmkindigi bar.

Sonymen qatar 4D formatta zertteý júrgizý múmkindigi de týyp otyr. Patsıenttiń barlyq transplantologııalyq ólshemin anyqtap, bere alamyz. ıAǵnı onyń baýyr qyzmeti, tynys alýy, as qorytý jáne taǵy basqa aspektorlar boıynsha. Apparat aǵzanyń qurylymyn ǵana emes, sonymen qatar onyń qyzmetin egjeı-tegjeıli kórsetedi. Sondaı-aq apparattyń kómegimen joǵary sapaly sýretter men dál qorytyndy alýǵa bolady. Odan bólek, «640-kompıýterlik tomografııa apparaty rentgendik-sáýle radıatsııasyn 2 ese az taratady», - dedi QR Prezıdenti Іs basqarmasynyń Medıtsına ortalyǵy kompıýterlik jáne magnıttik rezonanstyq bóliminiń meńgerýshisi Elmıra Elshibaeva.

Emdeý-dıagnostıka blogynyń ashylýyna QR Prezıdenti Іs basqarmasynyń Medıtsına ortalyǵynyń basshysy Alekseı Tsoı qatysyp, ortalyqtyń jumysymen tanysty.

«QR Prezıdenti Іs basqarmasynyń aýrýhanasynda em alýǵa aımaqtardan kóptegen ótinish kelip tústi. Patsıentter elimizdiń túkpir-túkpirinen joldama ala alady. Mindetti áleýmettik medıtsınalyq saqtandyrý júıesi arqyly ár óńirde emdeýge jatqyzý portaly boıynsha naýqastardy osynda jiberýge bolady. Azamattarymyz úzdik tehnologııa úshin shetelge baryp emdeledi. Al bul jerde barlyq tehnologııa qoljetimdi. Endi óz elimizde emdeı alamyz. Osy korpýsty ashý úshin bizdiń ortalyq birneshe jyl boıy mamandar daıarlady. Mamandar dıagnostıka jasap, emdeýdiń zamanaýı tásilderin úırendi. Otandyq densaýlyq saqtaý salasy jyl sanap jaqsaryp keledi. Jańa medıtsınalyq nysandar ashylyp, patsıentterdiń óz elimizde em alýyna jaǵdaı jasalyp jatyr. Bul biz úshin mańyzdy», - dedi ol.