Elordadaǵy etno ansambl ujymy Elbasyna izgi tilekterin bildirdi

NUR-SULTAN. QazAqparat – Nur-Sultandaǵy Memlekettik akademııalyq fılarmonııanyń «Qorqyt» etno ansambliniń ujymy koronavırýske shaldyqqan Elbasy Nursultan Nazarbaevtyń denine saýlyq tiledi, dep habarlaıdy QazAqparat tilshisi.

«Qazaq eli – barlyq ultty bir shańyraq astyna jınaǵan qutty qonys, meıirimdi meken, birligi myqty, mártebesi asqaq memleket. Qashanda rýhy - ór, táni-bekem memlekettiń árbir jasalǵan isteriniń nyq bolýy ol Sizdiń el úshin atqarǵan eńbekterińiz ekeni aıdan-anyq. Tezirek saýyǵyp ketýińizdi tileımiz. Táýelsizdiktiń alǵashqy kúnderinen bastap ulttyq ónerimizdiń damýyna jáne qoldaý kórsetkenińizge alǵys bildiremiz. Qurmetti Nursultan Ábishuly! Sizge Altyn Orda handyǵynyń 750 jyldyǵy aıasynda 75 shyǵarma oryndap, Gınness rekordtar kitabyna engen Nur-Sultan qalasy ákimdigi Memlekettik akademııalyq fılarmonııasynyń «Qorqyt» etno ansambliniń ujymy atynan zor densaýlyq, mol baqyt, uzaq ǵumyr tileımiz!» - dedi «Qorqyt» etno ansambliniń kontsertmeısteri Aıbek Árimbek.

Elbasy Nursultan Nazarbaevtyń COVID-19-ǵa tapsyrǵan synamasy oń nátıje kórsetkeni buǵan deıin habarlanǵan bolatyn.

Búgin Elbasynyń baspasóz hatshysy Aıdos Úkibaı Tuńǵysh Prezıdenttiń densaýlyǵyna qatysty alańdaýǵa negiz joq ekenin aıtty.

Sondaı-aq ol qazaqstandyqtardyń birligi, olardyń izgi jáne shyn kóńilden bildirgen tilekteri Nursultan Nazarbaevqa kúsh beretinin jáne Elbasy ózine jazylǵan hattar men telegrammalardy oqyp shyǵatynyn jetkizdi.

Buǵan deıin Reseı Prezıdenti Vladımır Pýtın Tuńǵysh Prezıdentke hat joldap, telefon arqyly da sóılesken bolatyn. Sondaı-aq Túrkııa Prezıdenti Rejep Erdoǵan, AQSh Memlekettik hatshysy Maık Pompeo, Tájikstan men Izraıl basshylary, Úndistannyń Premer-Mınıstri Narendra Modı habarlasyp, izgi tilekterin bildirdi. Sonymen birge, Nursultan Nazarbaevtyń atyna óner jáne qoǵam qaıratkerlerinen, JOO rektorlarynan, depýtattardan, kóptegen eńbek ujymdarynan telegrammalar túsip jatyr.