Elordadaǵy dámhanada ýlanǵandar sany 20-ǵa jetti: tergeý júrip jatyr

ASTANA. KAZINFORM — Keshe elordadaǵy «Kóktem» dámhanasynan as ishken adamdardyń ishek ınfektsııasynan jappaı ýlaný jaǵdaıy tirkeldi.

Bul týraly Astana qalasy Sanıtarııalyq-epıdemıologııalyq baqylaý departamenti basshysynyń orynbasary Janna Pralıeva málim etti.

— Búginde astan ýlanǵandar sany 20 adamǵa jetti, onyń 11-i bala. Atalǵan fakti boıynsha dámhanada epıdemıologııalyq tergep-tekserý jumystary bastaldy. Zerthanalyq zertteýlerge taǵam ónimderi, syrtqy ortadan alynǵan juǵyndylar, sondaı-aq qyzmetkerler tekserildi, — dedi Janna Pralıeva.

Qazir zerthanalyq synaq nátıjeleri ázirlenip jatyr. 

— Tergeý jáne epıdemııaǵa qarsy is-sharalar jalǵasyp jatyr. Sondaı-aq, jappaı ýlaný jaǵdaıynyń tirkelýine baılanysty polıtsııa basqarmasy tarapynan sotqa deıingi tergep-tekserý bastaldy, — deıdi ol.

Buǵan deıin elordada «Kóktem» dámhanasynyń asynan on adam ýlanǵany týraly jazǵan edik. Qazir olardyń jaǵdaıy — ortasha aýyr. 

Eske salsaq, ótken jyly SQO-da bir otbasy astan ýlanyp, 2 bala qaıtys boldy. 

Jyl basynda Mańǵystaý oblysyna qarasty Qyzylsaı aýylynda balabaqshada balalar astan ýlandy. 

Sondaı-aq Túrkistanda sýshı jegen 22 turǵyn ýlanyp qalǵany týraly jazǵan edik.