Elordada jasyryn zerthanadan 6 kg sıntetıkalyq esirtki tabyldy
Jedel-izdestirý is-sharalarynyń nátıjesinde Aqmola oblysy Tselınograd aýdany Talapker aýylyndaǵy úılerdiń birinde Qyrǵyzstannyń 24 jastaǵy týmasy ustaldy. Ol ózi jaldaǵan úıde sıntetıkalyq esirtki óndirisin jolǵa qoıǵan.
QR ІІM-niń salalyq Departamentinen málim etkendeı, kúdikti qarasha aıynda «esirtkini jasyrýshy» bolyp jumysqa ornalasqan. Bir aıdan keıin úıdi jalǵa alyp, «esirtkini qaınatýshy» qyzmetine aýysqan. Keıin esirtkiniń iri partııalaryn Telegram messendjeri arqyly kóterme baǵamen satýǵa kirisken.
Úıdi tintý kezinde 6 keliden astam tutynýǵa daıyn túrindegi, sondaı-aq 10 lıtr suıyq túrindegi «α-PVP» (jyldamdyq) sıntetıkalyq esirtkisi, ártúrli zerthanalyq zattar (gıgrometrler, jeldetkishter, ólsheýish staqandar, plastmassa eleýishter, 100 dana «zip-lock» polıetılen paketteri, elektrondyq tarazylar, respıratorlar, skotch oramy, bir ret qoldanylatyn qolǵaptar jáne bos plastıkalyq konteınerler) tabylyp, tárkilendi.
Tergeý áreketterin júrgizý barysynda kúdikti esirtkini satý úshin «jasyryp» úlgergeni anyqtaldy. «Atalǵan derekti polıtsııa qujattap, nátıjesinde ishki ister organdarynyń qyzmetkerleri taǵy 1 kg «α-PVP» sıntetıkalyq esirtkisin tárkiledi.
QR QK-niń 297-baby 3-bóligi «Esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz daıyndaý, óńdeý, satyp alý, saqtaý, tasymaldaý» boıynsha sotqa deıingi tergeý bastaldy.
Ustalǵan azamat ýaqytsha ustaý abaqtysyna qamaldy. Ol 15 jylǵa deıin bas bostandyǵynan aıyrylýy múmkin.
Qazirgi ýaqytta esirtkilerdiń túsý arnasyn jáne olardyń zańsyz aınalymyna qatysy bar adamdardy anyqtaý boıynsha is-sharalar júrgizilýde. Aıta ketý kerek, bul jyl basynan beri ishki ister organdarynyń esirtki qylmysyna qarsy is-qımyl bólinisteriniń joıǵan besinshi esirtki zerthanasy», - delingen polıtsııa málimetinde.
