Elordada jasyl ekonomıkadaǵy jahandyq trendter talqylandy
Halyqaralyq seriktestik ortalyǵynyń Qazaqstandaǵy Frantsııa Elshiligimen birlesip ótkizgen sharaǵa qatysýshylar jasyl ekonomıkadaǵy jahandyq trendterdi, jańartylatyn energııa salasyndaǵy frantsýzdyq ınnovatsııalardy talqyǵa saldy.
«Búgingi dóńgelek ústel taqyryby óte mańyzdy. Búkil álemniń joǵary basqarýshy kadrlary klımattyq jáne ekologııalyq mindetterdi sheshýge ózderiniń umtylatyndyǵyn kórsetý tıis. Frantsııa men Qazaqstannyń talaptary ortaq bolyp keledi. Sondyqtan dál osy máseleni sizdermen birge talqylaý men úshin barynsha mańyzdy. Ekologııalyq máseleler ekonomıkalyq ta, ekologııalyq ta deńgeıde 21 ǵasyrdyń syn-qateri sanalady. Bul álemdik aýqymdaǵy problema», - dedi dóńgelek ústeldiń ashylýynda sóz sóılegen Frantsııanyń Qazaqstandaǵy Elshisi Fılıpp Martıne.
Osy rette sheteldik dıplomat ónerkásiptik óndiris oshaqtary jaqyn arada ekologııalyq problemalardy sheshýmen qatar onyń aldyn alý joldaryn da oılastyrýy qajettigin basa aıtty.
«Búginde klımattyq is-sharalardyń strategııalyq sektory naqty aıqyndalǵan. Ol - jańaratyn energııa kózderi, aýyl sharýashylyǵynda, kólik salasynda ınnovatsııa engizý. Bul tizimge kommýnıkatsııalardy da qosar edim. Óıtkeni, klımattyń ózgerýi problemalaryna jáne onyń adamnyń densaýlyǵyna áserine nazar aýdartý qajet», - dedi Fılıpp Martıne.
Dóńgelek ústel barysynda Nazarbaev Ýnıversıtetiniń professory Fılıpp Forre «Qazaqstan jáne jańa energııa» taqyrybynda, al frantsýzdyq professor Jan-Per Korde «Jańaratyn energııa salasyndaǵy frantsýz ınnovatsııalary» taqyrybynda baıandama jasady.
