Elordada jas ustazdardyń baspana máselesin sheshetin ortalyq ashyldy
Jańa ortalyq – bul jaı ustazdar turatyn oryn ǵana emes, jas muǵalimder sabaqtan alǵan áserimen bólisetin, zamanaýı ıdeıalar men ınnovatsııalyq bilim berý jobalaryn talqylaıtyn dıalog alańy.
Elordalyq jas muǵalimder klýby men kóshbasshylardyń rezerv mektebi de osy jerde jumysyn jalǵastyrady.
«Jastar óziniń biliktiligin arttyrý úshin osynda tájirıbeli pedagogtardy shaqyryp turamyz», - deıdi Nur-Sultan qalalyq bilim basqarmasynyń basshysy Ánýar Janǵozın.
Aıta keteıik, ortalyqta shahmat, ústel tennısi qoıylǵan demalys bólmesi, kitaphana, ashana, oqý synyptary bar.
Qazirgi ýaqytta 200-den astam jas ustaz kiltterin alyp, qonystana bastady.
Úmitkerler kelesi krıterııler boıynsha tańdaldy: pedagogıkalyq bilim (úzdik dıplom alǵandarǵa artyqshylyq beriledi), jalpy jumys ótili 5 jylǵa deıin (Nur-Sultan qalasynyń bilim berý uıymdarynda).
Úmitkerlerdi tańdaý kezinde pedagogıkalyq qyzmette jetistikteri bar jáne bilim berý uıymynyń qoǵamdyq ómirine qosqan úlesin eskere otyryp, jas muǵalimderge artyqshylyq beriledi.
Ótinimderdi bilim basqarmasyndaǵy komıssııa qaraıdy. Onyń quramyna kásipodaq, qoǵamdyq uıymdar, QR Sybaılas jemqorlyqqa qarsy is-qımyl agenttigi, BAQ ókilderi, ata-analar qaýymdastyǵy kirdi.
Á. Janǵozınniń aıtýynsha, osy ortalyqty ashý arqyly bilim berý vedomstvosy elordadaǵy kardlyq tapshylyqty sheshýge qadam jasap otyr. Óıtkeni baspana máselesine alańdaǵan óńirlerdegi bilikti jas ustazdar elordaǵa kele bermeıdi.
«Jas muǵalimderdiń eńbekaqysy páter jaldaýǵa jetpeıtinin eskere kele, bul ortalyqta bir aıdaǵy tólem 17 myń teńge bolady», - dedi ol.
