Elordada jańa saıabaqtyń qurylysy bastalady

NUR-SULTAN. QazAqparat - Álemdik jáne dástúrli dinder lıderleriniń VII sezi qarsańynda elimizdegi túrli konfessııalar men ulttar arasyndaǵy yntymaqtastyqty, dostyq pen birlikti beıneleıtin tabıǵı-rekreatsııalyq saıabaq tujyrymdamasy ázirlendi, dep habarlaıdy QazAqparat.

Beıbitshilik pen kelisim saıabaǵy Nur-Sultan qalasyndaǵy Esil ózeniniń boıynda elorda ákimdiginiń qoldaýymen júzege asyrylady. Qala ákimdigi Ýrbanıstıka ortalyǵynyń málimetinshe, jobanyń negizgi ıdeıasy - «Ómir aǵashy» monýmenti. Bul qurylys kúmbez túrinde jasalady, onyń ortasyna japyraqty aǵash – emen aǵashyn ornalastyrý josparlanýda. Aǵash spıralmen jáne úılesimdi sýburqaqpen - sý betimen qorshalady.

«Avtor ıdeıasyna sáıkes, ǵasyrlar boıy tamyry tereńde jatqan sý men ómir aǵashy jer betindegi tirshiliktiń naqty beınesin aıshyqtaıdy. Osylaısha, ınstallıatsııa barlyq konfessııalardyń kelisimge, beıbitshilik pen dostyqqa shaqyrýyn bildiredi. Kúmbez óz kezeginde bir aspan astyndaǵy álemdi beıneleıdi. Onda 4 negizgi núkteni – Ońtústik, Soltústik, Batys, Shyǵysty bildiretin 4 kirý aımaǵy bolady», - dep túsindirdi ortalyqtan.

Kúmbez qabyrǵalarynda Dúnıeniń jaratylýyn, Qazaqstan tarıhyndaǵy oqıǵalardy kórsetetin beıneler, sondaı-aq qazirgi zamanǵa úndeý retinde elimizdiń aýmaǵynda tabylǵan áıgili ejelgi jartas sýretteri – petroglıfter salynady. Aǵashtyń aınalasyndaǵy spıral aspandy (kúmbezdi) jáne jerdi (sý betin) baılanystyrady, osylaısha álemniń náziktigi týraly ıdeıany jetkizedi.

Álemdik jáne dástúrli dinder lıderleriniń VII sezi delegatsııalary basshylarynyń sany boıynsha «Ómir aǵashy» monýmentiniń aınalasyna 50-den astam japyraqty jáne qylqan japyraqty aǵashtar otyrǵyzylady. Shara delegattary da tutas kontseptsııa negizinde ortalyq aǵashtaryn otyrǵyzýǵa qatysady. Aǵashtardyń janyna saıabaq irgetasynyń qoıylǵan kúni jazylǵan eskertkish taqtalar ornatylady.

Saıabaqtyń qurylysyn aıaqtap, paıdalanýǵa berý 2023 jylǵa josparlanǵan.