Elordada «Zań termınologııasyn jetildirý máseleleri» atty ádistemelik semınar ótti

NUR-SULTAN. QazAqparat – Búgin, 22 qarashada elordada QR Mádenıet jáne sport mınıstrligi Til saıasaty komıtetiniń tapsyrmasymen Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy «Zań termınologııasyn jetildirý máseleleri» atty respýblıkalyq ádistemelik semınaryn ótkizdi, dep habarlaıdy QazAqparat atalmysh vedomostvonyń baspasóz qyzmetine silteme jasap.

Ádistemelik semınardyń ózektiligi zańnamalyq qujattardyń qoǵam suranysyna sáıkes memlekettik tilde saýatty jazylýy, zań termınderin júıeleý, zańnamalyq qujattardy qazaq tiliniń jazý normalaryna sáıkes retke keltirý boıynsha qordalanǵan problemalardy talqylaýǵa negizdelgen.

Zańnamalyq qujattardyń qoǵam suranysyna sáıkes memlekettik tilde saýatty daıarlaný máselelerin talqylap, ony sheshýdiń joldaryn berýdi kózdeıtin ádistemelik semınarda zańnama tiliniń aýdarma til deńgeıinen asa almaý sebepteri men odan shyǵatyn saldar basa kórsetildi.

Zań normalaryn, qaǵıdalary men erejelerin ulttyq tildiń aıasynda qarastyrý múmkindigi oqylǵan baıandamalar men sóılengen sózderdiń basty taqyrybyna aınaldy. Qazaqstan Respýblıkasy Parlamenti Senatynyń depýtaty N. Júsip, ǵalym-termınolog, professor Sh.Qurmanbaıuly, Bas Prokýrordyń aǵa kómekshisi – Memlekettik til tobynyń jetekshisi Ernur Ýálı zań salalaryndaǵy termınderdi tolyqtyrý jáne olardy birizdendirý máseleleri boıynsha qundy pikirlerin ortaǵa saldy.

Májilis depýtaty A.Smaǵulov zań jobalarynyń termınologııalyq birizdiligin qamtamasyz etý problemalaryna qatysty óz usynystaryn bildire kelip, memlekettik organdar daıyndaǵan halyqaralyq sharttyń, zań jobasynyń memlekettik tilde sapaly daıyndalýyn olardyń qyzmet tıimdiligin baǵalaý reıtıngine nysanaly ındıkator retinde engizse durys bolar edi degen oı tastady.

Qazaqstan Respýblıkasy Parlamenti Májilisi Apparatynyń Redaktsııalaý jáne aýdarma bóliminiń meńgerýshisi D. Omashuly normatıvtik quqyqtyq aktiler jobalarynyń orys tilinde ázirlenýi, Parlamentke kelip túskenshe osy jobalardyń orys tilindegi mátini ǵana pysyqtalyp, al qazaq tilindegi aýdarma nusqasynyń nazardan tys qalýy, jalpy alǵanda ulttyq zańnama tiliniń, onyń termınologııasynyń orys tilindegi nusqaǵa baılanyp qalýy ulttyq zańnamanyń tili men termınderindegi birizdiliktiń saqtalmaýyna sebep bolyp otyrǵanyn basa kórsetti.

Іs-sharaǵa zań salasynyń jetekshi mamandary, Qazaqstan Respýblıkasy Úkimetiniń janyndaǵy Respýblıkalyq termınologııa komıssııasynyń músheleri, Qazaq tili álipbıin latyn grafıkasyna kóshirý jónindegi Ulttyq komıssııa janyndaǵy Termınologııalyq jumys tobynyń músheleri, memlekettik organdardyń qyzmetkerleri, ulttyq kompanııalar men BAQ ókilderi qatysty.

Ádistemelik semınardyń qorytyndysy boıynsha memlekettiń til saıasatyn odan ári jetildirýge baǵyttalǵan qarar qabyldandy.