Elordada Ulttyq taǵam zaly men Qabyldaý úıi salynady
ASTANA. KAZINFORM – Elordada qalalyq ınfraqurylymdy damytý qarqyndy jalǵasyp jatyr. Máselen, Astananyń Qalalyq orta sapasy jáne baqylaý basqarmasy Kazinform saýalyna oraı 2 nysan qurylysynyń júrgizilip jatqanyn málimdedi.
Atalǵan nysandardyń birinshisi — meıramhana kesheni bar Ulttyq taǵamdardyń kórme zaly. Ol J.Nájımedenov pen Q.Amanjolov kósheleriniń qıylysynda, Táýelsizdik saraıyna jaqyn mańda salynady. Ýchaske aýdany 0,6112 gektar.
— Elicense.kz aqparattyq bazasynyń derekterine sáıkes, qurylys salýshy «Barap» JShS qurylys-montaj jumystarynyń bastalǵany týraly habarlama berdi, — dep atap ótti ákimdikten.
Ekinshi nysan — Qabyldaý úıi. Ol J.Nájımedenov pen Sh.Qaldaıaqov kósheleriniń qıylysynda, Prezıdent saıabaǵy aýmaǵynda salynady. Jer ýchaskesi Prezıdent Іs basqarmasyna izdeý jáne jobalaý jumystaryn júrgizý úshin Astana ákimdiginiń qaýlysy negizinde 2029 jyldyń 25 maýsymyna deıin berilgen.
Ákimdiktiń atap ótýinshe, munan bólek, qalada áleýmettik nysandar — mektepter, balabaqshalar, oqýshylar saraıy jáne ózge de qoǵamdyq maqsattaǵy mekemelerdiń qurylysy júrgizilip jatyr. Aıtalyq, osy jyldyń tamyzynda elordada 28 myń orynǵa arnalǵan 7 jaıly mektep qurylysy aıaqtalady. 2029 jylǵa deıin, 2026-2028 jyldary aralyǵynda eki aýysymda 157 myń oqýshyǵa bilim beretin 63 mektep salý josparlanǵan.
Qazirgi ýaqytta ákimdik ınjınırıngtik jáne qurylys kompanııalarymen jumys kezdesýlerin ótkizip jatyr. Onyń maqsaty — sáýlet, qurylys jáne qala qurylysy normalarynyń buzylýyn eskertý.
Buǵan deıin elordadaǵy Muńaıtpasov stadıony men «Qazaqstan» sport saraıynyń qurylysy qashan aıaqtalatynyn jazǵan edik.