Elordada turǵyn úı daýy, salyqtyq qatynas boıynsha ákimshilik is jıi qozǵalady
ASTANA. KAZINFORM – Elordada sot oryndaýshylar isi, turǵyn úı daýy, salyqtyq qatynas boıynsha ákimshilik ister jıi qozǵalady. Bul týraly Astana qalalyq sotynyń ákimshilik ister jónindegi sot alqasynyń tóraǵasy Damır Ábdiǵalıev aıtyp berdi.
«Elordada qaralǵan ákimshilik isterdi taldaý halyq úshin bılik organdarymen ózara is-qımyldyń anaǵurlym sezimtal salalaryn anyqtaýǵa múmkindik beredi. Burynǵysynsha, kóbinese azamattar men zańdy tulǵalar ákimshilik sot isin júrgizý sheńberinde sot oryndaýshylarynyń áreketteri men aktilerine daý aıtady. Bul sala atqarýshylyq is júrgizýge qatysatyndar úshin ózekti bolyp qala beredi. Ásirese Ákimshilik rásimdik-protsestik aıasynda sot oryndaýshylarynyń árbir is-áreketine (nemese áreketsizdigine) jáne aktilerine daý aıtýǵa bolatynyn eskerý kerek», - dedi D. Ábdiǵalıev Astana kommýnıkatsııalar qyzmetinde ótken brıfıngide.
Spıker aıtqandaı, bul sanat boıynsha ister sany azaıyp keledi, 2021 jylǵy derekterge sáıkes, kelip túsken talaptardyń jalpy sanynyń 42%-dy qurasa, 2023 jyly bul kórsetkish 33% boldy, ıaǵnı, 10% tómendeý bar. Sondaı-aq sot oryndaýshylary jiberilgen qatelikterdi moıyndaý, túzetý jolymen sotta jıi tatýlasady.
«Ákimshilik isterdiń edáýir bóligin qala ákimdigi men onyń basqarmalaryna qatysty ister quraıdy. Qordyń memlekettik turǵyn úılerinen turǵyn úı alý, kezekte turǵandardyń tizimin júrgizý, turǵyn úı tólemderin alý máseleleri áleýmettik turǵydan óte mańyzdy bolyp qala beredi. Osy sanattar boıynsha shaǵymdar da ósýde. Máselen, 2021 jyly isterdiń jalpy sanynyń 4,6%-y ǵana turǵyn úı daýlary bolsa, 2022 jyly bul kórsetkish 5,1%, 2023 jyly – 7%-ǵa deıin kóbeıdi», - deıdi ol.
Ókinishke qaraı, statıstıka talaptardyń negizdiligi jyl saıyn ósip kele jatqanyn kórsetedi. Mysaly, eger 2021 jyly talaptardyń 56%, 2022 jyly - 50%-y qanaǵattandyrylsa, 2023 jyly talaptardy qanaǵattandyrý kórsetkishi 78%-dy qurady.
«Bul ákimshilik organ jumysynda júıelik qatelikter bar ekenin, árbir daýly máseleni sheshýge jeke kózqarastyń joqtyǵyn kórsetedi. Elordalyq ákimshilik sot tájirıbesinde salyqtyq quqyqtyq qatynastar men memlekettik satyp alý salasyndaǵy daýlar da jıi bolady. Bul kásipkerler úshin óte ózekti. Munda da ósim baıqalady. 2021 jyly olardyń paıyzdyq ara qatynasy 9% bolsa, 2023 jyly – 12%-ǵa jetken. Osy sanat boıynsha qanaǵattandyrylǵan talaptar da 2021 jyly 41,5%-dan 2023 jyly 78,9%-ǵa deıin ósken», - dedi Damır Ábdiǵalıev.
