Elordada súıektiń qaterli isigin emdeıtin ekinshi preparat synaqtan sátti ótti

ASTANA. QazAqparat – Astanadaǵy ıadrolyq medıtsına ortalyǵynyń bazasynda osymen ekinshi ret radıofarmatsevtıkalyq preparat synaqtan sátti ótip, óndiriske jiberildi. Bul týraly QR Prezıdentiniń Іs Basqarýshysy Aıbek Dádebaev málim etti, dep habarlaıdy QazAqparat tilshisi.

«Prezıdent is basqarmasy medıtsınalyq ortalyǵynyń aýrýhanasynyń jaǵymdy jańalyǵy bar. Juma kúni osy habardy bóliskendi jón kórip otyrmyn. Klınıka bazasyndaǵy ıadrolyq medıtsına ortalyǵynda 18F-NaF (natrıı ftor) radıofarmatsevtıka preparatyn shyǵarý jobasy sátti júzege asty. Bul preparat súıektegi isik metastazanyń barlyq túrin, sonymen qatar zaqymdanǵan súıek isikterin dıagnostıkalaýǵa arnalǵan. Osylaısha, bizdiń mamandar súıek qaterli isigin emdeýde mańyzdy nátıjege qol jetkizdi», - dep jazdy Aıbek Dádebaev Telegram paraqshasynda.

Sonymen qatar ol aldyn ala valıdatsııalyq is-sharalar jasalyp, mamandar jańa preparattyń GMP talaptaryna (tıisti óndiristik praktıka) saı ekenine kóz jetkizgenin atap ótti.

Odan bólek, atalǵan preparattyń halyqaralyq joǵary standarttarǵa saı ekeni aıtyldy.

«Esterińizde bolsa, Prezıdent is basqarmasy medıtsınalyq ortalyǵynyń aýrýhanasy janyndaǵy tsıklotrondy-óndiristik keshen byltyr qazan aıynda ashylǵan edi. 18F-NaF - osy ortalyqta sátti shyǵarylyp otyrǵan ekinshi radıofarmatsevtıkalyq preparat. Bıyl qaterli isik aýrýlaryna qatysty dıagnostıkalyq zertteý júrgizýge arnalǵan taǵy úsh preparat óndiriske jiberilmek. Barlyq taldaýlar shetelde emes, Astanada jasalady», - deıdi ol.