Elordada sý qaýipsizdigi jáne transshekaralyq sýdy paıdalaný máseleleri talqylanyp jatyr
ASTANA. KAZINFORM – Elordada Aral sammıti aıasynda «Sý qaýipsizdigi jáne transshekaralyq sý paıdalaný: syn-qaterler men sheshimder» atty halyqaralyq konferentsııa ótti.
- Bolashaqta sý qaqtyǵysy bolady dep jatyr, biz ony kútip otyrmaı, búginnen bastap kelissóz júrgizý kerek, aldymen aımaqtyq kelisimge kelýimiz qajet. Bizge jer beti sýlarynyń 80 paıyzy kórshi elderden keledi, ıaǵnı Qytaıdan, Ózbekstannan, Reseıden keledi. Biz ol elderden yntymaqtastyqta jumys istesek, jańa tehnologııany birlesip paıdalansaq, sý bárimizge jetedi. Paıdalanǵan sýdy qaıta óńdep taǵy tutynsaq únemdeımiz. Búgingi jıynǵa ǵalymdardy da shaqyryp otyrmyz, sýdy únemdeýde ǵalymdardyń kómegi kerek. Sonymen qatar qarjy ortalyqtary ókilderin shaqyrdyq, -dedi BAYTAQ jasyldar partııasynyń tóraǵasy Azamathan Ámirtaev.
Halyqaralyq konferentsııaǵa Qazaqstan, Ózbekstan, Qyrǵyzstan, Mońǵolııa, Aýǵanstan, Reseıden meımandar qatysty.
- Keler jyly Memleket basshysynyń bastamasymen aımaqtyq klımattyq sammıt ótedi, oǵan Ortalyq Azııa elderiniń basshylary qatysady dep kútilip otyr. Sol sammıtte osy Aral máselesi prezıdentterdiń nazaryna ilinse eken degen oımen búgingi is-sharany uıymdastyryp otyrmyz. Byltyr biz Túrkistanda kórshi elderdiń jasyldar partııasymen birigip «Aral» sammıt degen halyqaralyq qozǵalys qurdyq, sol jerde ekologııalyq máselelerdi kóterip jatyrmyz, - deıdi ol.
Mamandar Aral taǵdyry eki máselege kelip tirelip turǵanyn aıtyp otyr, birinshi ǵylymı zertteý, ekinshi qarjylandyrý.
Eske salsaq, jyl basynda Májilistiń qaraýyna Aral teńiziniń jer qoınaýyn paıdalanýǵa tyıym salatyn zań jobasy tústi.