Elordada stýdentter men oqýshylar birigip, átir óndiredi
ASTANA. KAZINFORM — Astana qalasyndaǵy № 91 mektep-gımnazııasy men Servıs jáne týrızm kolledji ózara yntymaqtastyq týraly ekijaqty memorandýmǵa qol qoıdy, dep habarlaıdy elorda ákimdiginiń resmı saıty.
Bul kelisim bilim alýshylardyń shyǵarmashylyq jáne kásibı áleýetin damytýǵa baǵyttalǵan tyń jobanyń bastamasy boldy.
Jańa joba aıasynda № 91 mektep-gımnazııasy buǵan deıin AQSh-tyń Vashıngton ýnıversıtetimen seriktestik ornatyp, átir óndirisinde qoldanylatyn qospa maılardy alý jóninde kelisim jasaǵan edi.
— Osy halyqaralyq tájirıbeni jalǵastyrý maqsatynda mektep-gımnazııanyń basshysy Almagúl Tilektesqyzynyń bastamasymen «Servıs jáne týrızm» kolledjiniń dırektory Saltanat Qaıratqyzymen memorandýmǵa qol qoıyldy. Yntymaqtastyq nátıjesinde kolledj stýdentteri men mektep oqýshylary Vashıngtonnan alynǵan átir qospa maılaryn paıdalana otyryp, gúlder men jemis-jıdekter negizinde jańa otandyq ıissý ónimderin daıyndaýdy bastady. Bul joba oqýshylar men stýdentterdiń hımııa, tehnologııa jáne shyǵarmashylyq baǵyttaǵy bilimderin tájirıbe júzinde ushtastyrýǵa múmkindik berip otyr, — delingen habarlamada.
Búgin eki oqý ornynyń bilim alýshylary arnaıy kezdesip, ózara tájirıbe almasty. Kezdesý barysynda jasalǵan ıissýlar tanystyrylyp, aldaǵy jumystar talqylandy. Al daıyn ónimderdiń resmı prezentatsııasy mamyr aıynda kópshilikke usynylady dep josparlanǵan.
Sonymen qatar, aldaǵy ýaqytta kolledjdiń florıstıka jáne landshaftyq dızaın mamandyqtarynda bilim alyp jatqan stýdentteri mektep aýlasyn abattandyrý jumystaryna atsalysyp, «Taza Qazaqstan» respýblıkalyq aktsııasyna óz úlesterin qospaq. Atalǵan joba bilim, bıznes jáne halyqaralyq tájirıbeni ushtastyra otyryp, otandyq ónim óndirýge baǵyttalǵan mańyzdy bastamalardyń biri bolyp otyr.
Osydan buryn AI-Sana baǵdarlamasy aıasynda 100 myń stýdent JI algorıtmderin meńgeretinin jazǵanbyz.