Elordada sıntetıkalyq esirtki jasaıtyn iri zerthananyń kózi joıyldy

NUR-SULTAN. QazAqparat - Іshki ister mınıstrligi esirtki qylmysyna qarsy is-qımyl departamentiniń qyzmetkerleri elordanyń jáne Qaraǵandy oblysynyń esirtki polıtseılerimen birlesip jedel-izdestirý is-sharalaryn júrgizý barysynda «Family Village» kottedj qalashyǵyndaǵy úılerdiń birinde sıntetıkalyq esirtkiniń óndirisin jolǵa qoıyp, qala aýmaǵynda olardyń kóterme saýdasymen aınalysqan eki jas qyzdy ustady, dep habarlaıdy Polisia.kz.

ІІM Esirtki qylmysyna qarsy is-qımyl departamenti bastyǵynyń orynbasary Asqar Muhametqalıevtiń aıtýynsha, ustalǵan qyzdardyń birimen jalǵa alynǵan úıdi tintý barysynda 1218 tabletka «Ekstazı» sıntetıkalyq esirtkisi, 2 kg «Alfa-PVP» sıntetıkalyq esirtkisi, sondaı-aq, esirtki óndirisinde qoldanylatyn zattar – 140 lıtrden astam prekýrsorlar jáne úı jaǵdaıynda esirtki daıyndaýǵa arnalǵan túrli zerthanalyq jabdyqtar tabylyp tárkilendi.

Tárkilengen esirtki quraldaryna sot-hımııalyq saraptamalar júrgizildi.

Osylaısha, polıtseıler sıntetıkalyq esirtki óndiretin kezekti esirtki zerthanasyn joıdy.

Aıta keteıik, ustalǵandar bir jyldan astam ýaqyt boıy sıntetıkalyq esirtkiniń iri partııalaryn daıyndap, «jasyrý» jolymen Telegram messendjeri arqyly satýmen aınalysqan.

Ustalǵandar taıaýda ǵana jalpy salmaǵy 1,2 kg mefedrondy qala syrtynda eki iri jerde jasyrǵany belgili boldy.

Olar qosymsha tergeý áreketteri barysynda tárkilenip alyndy.

Alynǵan sıntetıkalyq esirtkilerdiń jalpy salmaǵy 3 kg 840 gr qurady.

Ustalǵandardyń biri - Reseı Federatsııasynyń týmasy. Qazirgi ýaqytta aıyptalýshylardyń qylmystyq áreketterin qujattaý, sondaı-aq, basqa da qatysy bar adamdardy anyqtaý boıynsha is-sharalar júrgizilýde.

Esterińizge sala keteıik, 2021 jyly elimizdiń birneshe oblysynda Reseıden prekýrsorlar men zerthanalyq jabdyqtardy jetkizýmen, sondaı-aq, sıntetıkalyq esirtkilerdi ótkizýmen aınalysatyn transulttyq uıymdasqan toptyń qatysýshylaryn ustaý boıynsha iri sharalar júrgizilgen. Ótken jyly ishki ister organdary barlyǵy 17 esirtki zerthanasyn joıdy.