Elordada sıngapýrlyq bilim berý júıesi boıynsha mektep, kolledj ashylady
Astana qalasynyń ákimdigi, «Kazakh Invest» UK» AQ jáne sıngapýrlyq «Pegasus Education Group» kompanııasy Astanadaǵy bilim berý júıesin damytýǵa arnalǵan ınvestıtsııalyq jobany iske asyrý týraly kelisimge qol qoıdy.
«Jobanyń basty maqsaty: «Astana qalasynda úzdiksiz bilim alý úshin - balabaqsha - jalpy bilim beretin orta mektep - kásibı tehnıkalyq kolledj - bilim berý ortalyqtaryn qurý». Bul joba sıngapýrlyq bilim berý júıesinde qoldanylatyn tájirıbeniń negizinde júzege asyrylmaq», - delingen habarlamada.
Boljam boıynsha birinshi kezeńdegi jalpy ınvestıtsııa shamamen 20 mıllıon AQSh dollaryn qurap, jańa 300 jumys orny ashylady dep josparlanýda. Qala ákimdigi ınvestıtsııalyq jobalardy iske asyrý úshin jer telimi túrinde memlekettik nesıe berý, qajetti ınfraqurylymdy qurý, paıyzdyq mólsherlemelerdi sýbsıdııalaý, jan basyna qarjylandyrý sııaqty qoldanystaǵy memlekettik qoldaý sharalaryn qamtamasyz etý boıynsha keshendi kómek kórsetetin bolady.
Investor óz kezeginde jobany tıisti sıpattamalaryna sáıkes júzege asyrýdy josparlap otyr. Dálirek aıtqanda, sheteldik ınvestor Astanada keminde 200 (eki júz) oryndy balabaqsha, keminde 2 000 (eki myń) oryndy mektep jáne keminde 2 000 (eki myń) oryndy kolledj ashpaq. Jobanyń operatsııalyq qyzmetiniń sheńberinde jalpy pedagogıkalyq qyzmetkerdiń 30 paıyzyna qazaqstandyq pedagogtar tartylyp, túlekterdiń halyqaralyq dıplomdar men/jáne sertıfıkattardy alý múmkindigi bar halyqaralyq baǵdarlamalardy engiziledi.
Aıta keterligi, «Pegasus Education Group» kompanııasy óz qyzmetin 1986 jyly bastaǵan bolatyn. Ol Sıngapýrda úzdiksiz bilim berýdiń jeke bilim berý jelisin qurdy. Qazirgi ýaqytta kompanııa Ońtústik-Shyǵys Azııadaǵy 20-dan astam bilim ortalyǵyn basqarady. Mektepter halyqaralyq uıymdarmen akkredıttelse, kompanııa ASEAN sheńberinde bilim berý salasyndaǵy eń úzdik jeke kompanııalardyń biri bolyp tanyldy.
