Elordada saılanǵan ákimder forýmy ótedi

ASTANA. KAZINFORM – Erteń elordada saılanǵan ákimder forýmy ótedi. Bul týraly SARAP sarapshylyq klýbynyń otyrysynda Májilis depýtaty Aıdos Sarym aıtty.

- Memlekettik ıdeologııa degende kóp adam negizinen keńes zamanynda bolǵan dúnıeni eske alady. Mektepte jattap alyp, emtıhan tapsyratyn. Ondaı nárse emes jáne ondaı nárse bolýy da múmkin emes sııaqty. Shynyn aıtsam, bolǵanyn qalamaımyn. Óıtkeni jattalatyn, emtıhan tapsyratyn, damymaıtyn, dogmatıkalyq dúnıeler qoǵamdy, adamdy, ásirese ǵylym salasyn tyǵyryqqa tireıtini anyq. Munyń syrtynda jergilikti nemese aımaqtyq, salalyq máselelerdi damytýǵa bolady. Biraq, qazirdiń ózinde ishki saıasat salasynda jınalystar ótip, jumysymyzǵa qalaı engizý máselesi pysyqtalyp jatyr. Erteń Astanada Prezıdent qatysatyn saılanǵan ákimderdiń úlken forýmy ótip, oǵan 2 myńnan astam qatysady. Onda da kóp dúnıe aıtylady, - dedi Májilis depýtaty.

Onyń aıtýynsha, elimizde memlekettik qyzmette 100 myń adam jumys isteıdi.

- Bárimiz istep júrgen jumysymyzǵa senemiz be, senbeımiz be? Bizdegi ótirik dúnıeniń biri osy 20-30 jyldyń ishinde memlekettiń qaýqaryna, memleketimizge degen senimnen aıyryp qalǵan sııaqtymyz. Ne istesek te «oı qoıshy, quryp ketsinshi, taǵy da birdeńe bolyp qalady» dep senbeı jatamyz. 90 jyldary memlekettik qyzmette istegen adamdar biledi. Myqty bir vaıb, myqty bir draıv bolatyn. Kúni-túni jumysta bolatynbyz, qonatynbyz. Endi osyǵan aqyryndap kelsek... 100 myń qyzmetkerdiń 100 týysqany bar. Kúnine keminde 2 taksı júrgizýshisimen kezdesemiz. Taǵy da adamdar kelip jatady. Solarǵa ózimiz istep jatqan jumysty túsindire almasaq, onda bul saıasat júrmeıdi. Uly ǵalymdardyń «shyn ǵalym óziniń nemen aınalysyp jatqanyn 5 jasar balaǵa uǵyndyra almasa, onda ol ǵalym emes, alaıaq» degen eken. Memleketik qyzmetkerlerge de osy qatysty. Biz nemen aınalysyp jatqanymyzdy aǵaıynymyzǵa, jurtqa túsindirip aıta almasaq, onda bizdiki de alaıaqtyq. Shyndap kelgende ózimizge-ózimizdiń senbegenimiz jumysty shala-jansar atqarǵanymyzdyń kórinisi, - dedi Aıdos Sarym.

Aıta keteıik, taıaýda Memleket basshysy Qasym-Jomart Toqaev «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqqa qol qoıdy.