Elordada «Rýhy myqty asyl er» saıysy máresine jetti
Bıyl kórnekti ǵalym, abaıtanýshy, QR Memlekettik syılyǵynyń ıegeri, ulaǵatty ustaz Qaıym Muhamedhanovtyń týǵanyna 105 jyl. Osyǵan oraı Nur-Sultan qalasynyń Tilderdi damytý jáne arhıv isi basqarmasy, sondaı-aq «Rýhanııat» KMM-niń uıymdastyrýymen qaıratkerdiń rýhyna taǵzym etýge arnalǵan mektep oqýshylary arasynda «Rýhy myqty asyl er» atty qalalyq saıys ótti.
Saıystyń maqsaty - birtýar tulǵa Qaıym Muhamedhanovtyń ómir jolyn zerdeleý, el úshin atqarǵan eńbegin keńinen nasıhattaý, qunarly tilimizdiń órisin keńeıtip, ultyna adal otansúıgish jastardy tárbıeleý.
Saıysqa qalanyń 17 mektebi qatysyp, qaıratker shyǵarmashylyǵy boıynsha ózara baqtalasty.
Saıys qorytyndysy boıynsha júldeli 3-shi oryndarǵa 48 mektep-lıtseıiniń oqýshysy Alıma Qalıeva, 87 mektep oqýshysy Іlııas Myqtybek jáne 67 gımnazııa oqýshysy Dınara Aqmoldaeva ıe boldy. Al 76 mektep lıtseıiniń oqýshysy Abylaı Qaıratuly men Daryndy qyz balalarǵa arnalǵan «Bilim ınnovatsııa» lıtseı-ınternatynyń oqýshysy Alına Jazylǵan ekinshi oryn aldy. 1-orynǵa Álkeı Marǵulan atyndaǵy 40 mektep oqýshysy Ersaıyn Meıramuly laıyqty dep tanylsa, Qaıym Muhamedhanov atyndaǵy 90 gımnazııa oqýshysy Ibrash Nurıslam bas júldege ıe boldy.
Júldeli oryndarǵa ıe bolǵan balalar dıplomdar jáne baǵaly syılyqtarmen marapattaldy.
«Rýhanııat» mekemesiniń basshysy Meıramǵazy Saparǵalıev saıystyń maqsaty Alash ardaqtylarynyń isin jalǵastyrý, Qaıym Muhamedhanovtyń ómir jolyn zerdeleý, onyń eńbegin keńinen nasıhattaý, qazaq tiliniń órisin keńeıtý, otansúıgish jastardy tárbıeleý ekenin atap ótti.
«Qaladaǵy barlyq mektepten ótinish tústi. Onyń ishinde saıysqa 17 mekteptiń oqýshysyn iriktep aldyq. Búgingi saıysta osy oqýshylar baǵyn synady. Bul konkýrs alǵash ret uıymdastyrylyp otyr. Negizgi maqsatymyz – jastardyń ómirge degen kózqarasyn durys qalyptastyrý», - dedi M. Saparǵalıev.
