Elordada Respýblıka kúnine oraı qandaı is-sharalar ótedi
«Bıyl Memleket basshysy Respýblıka kúni merekesin qaıta jańǵyrtyp, oǵan «ulttyq» mártebesin berdi. Ulttyq mereke tujyrymdamasy aıasynda qalalyq is-sharalar jospary bekitildi. Respýblıka kúnine oraı qalada 200-den astam túrli formattaǵy shara uıymdastyrylady. Onyń jartysy ótti. Sonymen qatar ár aýdanda túrli salada qyzmet etip, eńbegi sińgen mamandar men erlik jasap el yqylasyna bólengen azamattar marapattalady», - dedi Astana qalalyq ishki saıasat basqarmasynyń basshysy Dáýren Babamuratov ákimdikte ótken baspasóz máslıhatynda.
Sondaı-aq, basqarma basshysynyń málimdeýinshe mereke qarsańynda jańa turǵyn úıler, áleýmettik nysandar jáne sporttyq keshender paıdalanýǵa beriledi.
«Sol sııaqty dóńgelek ústel, debat, kórme, tanymal tulǵalarmen kezdesý jáne shyǵarmashylyq baıqaýlar uıymdastyrylyp jatyr. Іs-sharalardyń qatarynda merekelik kontsert pen jas sýretshilerdiń kórmesi de bar», - deıdi ol.
Onyń aıtýynsha, búgin elordanyń barlyq bilim mekemelerinde Respýblıka kúni merekesine oraı saltanatty shara ótip jatyr.
Odan bólek, memlekettik ánurandy jappaı oryndaý aktsııasy ótedi.
Merekes qarsańynda sporttyq sharalar da uıymdastyrylmaq.
Atap aıtqanda, 24-25 qazanda fýtbol federatsııasy jáne tennıs ortalyǵymen birlesip balalar arasynda jarys ótkizý josparlanǵan.
Sonymen qatar «Etnoaýyl» ulttyq-mádenı kesheninde at jarystar ótedi.
Osy kúnderi «Qazanat» at sporty kesheninde báıge ótedi. Alaman men top báıgeden jarysqa elimizdiń 11 óńirinen 70 shabandoz qatysady.
Onyń ishinde Almaty, Shymkent, Qaraǵandy, Qyzylorda, Mańǵystaý, Almaty, Pavlodar, Túrkistan jáne Jetisý oblysynan qonaqtar keledi dep kútilýde.
Aıta keteıik, Astanada Respýblıka kúnine oraı merekelik otshashý bolady.
