Elordada pravoslav hrıstıandary Rojdestvony qalaı atap ótedi
Nur-Sultan qalasynyń Din isteri jónindegi basqarma basshysy Nurdáýlet Álmuhanovtyń aıtýynsha, shirkeýge keletin adam sany ǵımarattyń jalpy paıdaly aýdanynyń 30%-ynan aspaý kerek
«Pravoslav hrıstıandaryn Hrıstos Rojedestvosy merekesimen quttyqtaımyz! Sanıtarlyq-epıdemıologııalyq jaǵdaıǵa jáne memlekettik bas sanıtarlyq dárigerdiń qaýlysyna baılanysty shirkeýge keletin adam sany ǵımarattyń jalpy paıdaly aýdanynyń 30%-ynan aspaý kerek. Barlyq shirkeýde qaýipsizdik sharalary qatań saqtalady. Osyǵan baılanysty densaýlyǵy álsiz jáne 65 jastan joǵary egde jastaǵy adamdarǵa shirkeýge barmaı tura turýǵa keńes beremiz», - deıdi Nurdáýlet Álmuhanov.
Onyń aıtýynsha, erteń barlyq dinı rásim ádettegideı jasalady. Adamdar kóp jınalyp qalmasy úshin qulshylyq etý ýaqytyn saǵat 09:00, 10:00 jáne 12:00 ýaqytyna bólip qoıdy.
Kesheden bastap din qyzmetkerleri shirkeýde, al erteńnen bastap shirkeýlerdiń esigi pravoslav hrıstıandary úshin ashyq bolady. Shirkeýde din qyzmetkerlerinen bólek, aýdandyq ákimdik, qalalyq ákimdik qyzmetkerleri, sanıtarlyq dárigerler, polıtsııa qyzmetkerleri kezekshi bolady. Osynyń bárin Nur-Sultan qalasynyń Din isteri jónindegi basqarmasy rettep otyrady.
«Biz barlyq shirkeýdi aralap, qarap shyqtyq. Qalada úsh hram bar. Olardyń bárinde sanıtarlyq talaptar saqtalǵan. Merekelik dinı rásimder 7 qańtar kúni saǵat tańǵy 09:00-den bastap Ýspenskıı Kafedraldy Soborynda, Konstantıno-Elenınskıı soborynda jáne Serafıma Sarov hramynda ótedi. Shirkeýge kelýshilerge barlyq saqtyq sharalaryn saqtaý týraly eskertý aıtylady. Kezekshi top ta shirkeýde sanıtarlyq talaptardyń saqtalýyn qadaǵalaıdy. Qajet bolǵan jaǵdaıda maska taratylyp, sanıtaızer usynylady», - deıdi basqarma basshysy.
Ol shirkeýge bara almaıtyndar úshin dinı rásimderdi elordadaǵy tıisti saıttan jáne Instagram, You Tube, Facebook jelilerindegi resmı paraqshalarynan kóre alatyndyǵyn aıtty.
