Elordada «Ortalyq Azııa – Qytaı» formatynda Syrtqy ister mınıstrleriniń otyrysy ótedi

NUR-SULTAN QazAqparat - Elordada «Ortalyq Azııa – Qytaı» formatynda Syrtqy ister mınıstrleriniń otyrysy ótedi. Bul týraly QR Syrtqy ister mınıstri Muhtar Tileýberdi qytaılyq áriptesi Van Imen kezdesýden keıingi brıfıngide aıtty, dep habarlaıdy QazAqparat tilshisi.

«Saparyńyz barysynda elimizdiń Prezıdenti Qasym-Jomart Kemeluly Toqaevtyń sizdi qabyldaýy jáne «Ortalyq Azııa – Qytaı» formatynda Syrtqy ister mınıstrleriniń otyrysyna qatysýyńyz josparlanýda. COVID-19 indeti dúnıejúzilik deńgeıde óziniń zardabyn tıgizgeni ras. Qazirgi tańda bul indetti ózara seriktestik pen qoldaýdyń arqasynda jeńip kelemiz. Sol jeńistiń aıqyn dáleli retinde 2022 jylǵy 1 maýsymnan bastap Qazaqstan men Qytaı arasyndaǵy turaqty áýe qatynasy qalpyna keltirilgenin rızashylyqpen atap ótemin. Reısterdi «Air Astana» men «China Southern Airlines» kompanııalary oryndaıdy. Taraptardyń sheshimimen reısterdiń jıiligi ázirshe aptasyna eki márte iske asyrylady dep uıǵaryldy», - dedi Muhtar Tileýberdi.

Sonymen qatar, ol Qazaqstan men Qytaı Birikken Ulttar Uıymy, Azııadaǵy ózara yqpaldastyq jáne senim sharalary jónindegi keńesi, Shanhaı yntymaqtastyq uıymy jáne basqa da óńirlik jáne halyqaralyq uıymdar aıasynda tyǵyz yqpaldastyqty iske asyryp kele jatqanyn atap ótti.

«Qytaı tarapyna Azııa keńesin qurý bastamasyn qoldaýy úshin, sondaı-aq is-sharalarǵa árdaıym belsendi qatysýyna oraı alǵysymdy bildiremin. Osy jyldyń qazan aıynda Azııa keńesi qurylýynyń 30 jyl tolýyna baılanysty dıalog alańynyń 6-shy Sammıti ótkiziledi. Atalǵan is-sharaǵa Qytaı tarapy ádettegideı joǵary deńgeıde qatysatynyna senimdimiz. Epıdemıologııalyq jaǵdaıdyń turaqtalýynan keıingi jýyq arada elderimiz arasyndaǵy kóp salaly yntymaqtastyǵymyz odan ári eseleı damyp, jańa satylarǵa jeterine senim bildiremin», - dedi mınıstr.