Elordada oqýshylar VR arqyly bolashaq mamandyqtaryn synap kórdi
ASTANA. KAZINFORM — Elordada Jańarý kúnin merekeleý aıasynda mektep oqýshylaryna arnalǵan VR tehnologııalaryn qoldana otyryp, kásiptik baǵdar berý is-sharasy uıymdastyryldy.
Qatysýshylar ınteraktıvti tsıfrlyq ortaǵa enip, túrli mamandyqtardy «synap kórýge» múmkindik aldy. VR formaty arqyly olar tájirıbelik daǵdylarǵa ıe bolyp, ártúrli kásibı baǵyttardy óz kózimen kórdi.
Bilim berý úderisine ınnovatsııalyq tehnologııalardy engizý — sanaly, tsıfrlyq saýatty jáne zamanaýı álemniń talaptaryna daıyn jańa býyndy qalyptastyrý jolyndaǵy mańyzdy qadam. Mundaı format oqýshylardyń kókjıegin keńeıtip qana qoımaı, jeke qyzyǵýshylyqtary men tájirıbesine súıene otyryp, bolashaq mamandyǵyn tańdaýǵa alǵashqy qadam jasaýǵa múmkindik beredi.
— VR tek oıyn úshin ǵana emes, ol bilim berý salasynda da keńinen qoldanylady. Biz sońǵy eki jyldan beri tájirıbemizde 3D modeldeý men jasandy ıntellekt elementterin paıdalanyp kelemiz.
Mundaı tehnologııalar oqýshylarǵa materıaldy tereńirek túsinýge jáne praktıkalyq daǵdylardy damytýǵa kómektesedi.
Mysaly, VR arqyly ǵımarattar men túrli nysandardyń úlgilerin jasap, jobalarmen jumys isteýge bolady — bul qolmen sýret salýdan áldeqaıda tıimdi. Bul — geografııa, sáýlet, STEM pánderi men robototehnıka sııaqty túrli salalarda qoldanýǵa bolatyn ámbebap qural. Ol balalarǵa tek teorııany meńgerip qana qoımaı, ártúrli baǵytta ózderin synap kórýge múmkindik beredi. Sondyqtan VR tehnologııalary oqýshylardyń bolashaq mamandyq tańdaýǵa sanaly túrde kelýine yqpal etedi, — dedi № 59 mektep-lıtseıiniń geografııa páni muǵalimi Aıjan Orynbaeva.
Іs-sharanyń dál Jańarý kúni ótkizilýiniń de máni zor. Bul kún adam kapıtalyn damytý, jastardyń áleýetin ashý jáne el bolashaǵyna ınvestıtsııa salý ıdeıasyn bildiredi.
Óskeleń urpaqtyń bilim men tehnologııaǵa degen qyzyǵýshylyǵyn qalyptastyrý arqyly qoǵam turaqty ári damýdyń berik negizin qalaıdy.
Aıta ketelik Eńbek mınıstrligi bıyl 10 myńnan astam adamdy suranysqa ıe jumysshy mamandyqtarǵa úıretpek.