Elordada masa men shirkeıge qarsy kúres jumysy qalaı ótedi
ASTANA. KAZINFORM – Astananyń Qorshaǵan ortany qorǵaý jáne tabıǵatty paıdalaný basqarmasy dezınsektsııalyq jumys maýsymyna daıyndyq týraly, onyń ishinde masa men shirkeıge qarsy aýmaqtardy óńdeý josparyn tanystyrdy, dep habarlaıdy qala ákimdiginiń resmı saıty.
Bıyl dezınsektsııalyq jumys alty kezeńge bólinip júrgiziledi. Qalada qazirgi ýaqytta entomologııalyq monıtorıng bastalyp ketti – bul sý qoımalaryn jándikterdiń dernásilderin tekserý.
Veterınarııa jáne fıtosanıtarııa bóliminiń basshysy Azat Turapbaev daıyndyq jumysy aldyn ala bastalǵanyn aıtyp, qazir mamandar belsendi zertteýler júrgizip jatqanyn jetkizdi.
– Qazirgi ýaqytta Astananyń barlyq aýmaǵynda entomologııalyq zertteýler júrgizilýde. Biz sý qoımalaryn masa dernásilderiniń bolýyna qatysty tekseremiz. Jalpy, óńdeý jumysy sáýirdiń ekinshi jartysynan bastalady. Kúnine shamamen 110-120 dezınsektor jumyldyrylatyn bolady, - dedi ol.
Alty kezeńniń árqaısysy birneshe satydan turady: aldymen sý qoımalary óńdeledi, keıin – qalanyń ashyq aýmaqtary. Bul jumys ortalyqtan bastalyp, qala shetine qaraı taralady.
«Astanalyq dezınfektsııa» JShS-niń atqarýshy dırektory Altynbek Mertasov búgingi tańda negizgi daıyndyq jumysy tolyq aıaqtalǵanyn jáne mamandar jumysyna kiriskenin aıtty.
– 2 sáýirden bastap biz shaǵyn sý qoımalary men batpaqty jerlerge entomologııalyq monıtorıng júrgizýdi bastadyq. Ǵylymı top tekserýge shyqty. Qazir daıyndyq sharalary aıaqtalýda: tehnıka, jabdyqtar jáne personal tolyq daıyn. Sý qoımalarynan ekinshi-úshinshi kezeńdegi dernásilder tabylǵannan keıin óńdeýge kirisemiz. Keıin ashyq aýmaqtarǵa – saıabaqtarǵa, gúlzarlarǵa, turǵyn úı alaptary men joldarǵa ótemiz, - dedi Altynbek Mertasov.
Іs-shara barysynda qoldanylatyn tehnıkalar da kórsetildi. Olarǵa motorly arqalyq búrikkishter, ystyq tuman generatorlary, dezınsektsııalyq mashınalar, qaıyqpen óńdeýge arnalǵan jabdyqtar jáne agrodrondar kiredi.
Mamandar óńdeý kezinde adamdar men janýarlarǵa qaýipsiz, jumsaq preparattar qoldanylatynyn, al sý qoımalary úshin ekojúıege zııan keltirmeıtin bıologııalyq quraldar paıdalanylatynyn atap ótti.
Eske salsaq, budan buryn Astanada kemirgishter sanyn retteý jumystary júrgizilip jatqanyn jazǵan edik.