Elordada kompanııa «Eýropaǵa jumysqa turǵyzamyz» dep aldap, 70 adamnyń aqshasyn qaltaǵa basqan
Kúdikti Eýroodaq elderine azamattardy jumysqa turǵyzamyn dep aqsha jymqyrǵan.
Kompanııanyń 2019 jyldyń qyrkúıeginen bastap azamattarǵa Danııa, Norvegııa, Nıderlandy, Germanııa jáne basqa Eýropa elderine jumysqa turǵyzýǵa usynys jasaǵany anyqtaldy.
Qazaqstan azamattary Eýroodaq elderine resmı jumysqa turý múmkindigi týraly estigennen keıin JShS-ǵa júgingen.
Kompanııa elektrshi, pisirýshi, sylaqshy, tiginshi, tas qalaýshy mamandyqtary boıynsha eńbek kelisimshartyn usynyp otyrǵan.
Alaıda kompanııa óziniń mindetterin oryndamaǵan, bir de bir azamatty jumysqa turǵyzbaǵan.
2020 jyldyń qazanynda Tergeý komıteti asa iri somadaǵy alaıaqtyq faktisi boıynsha qylmystyq is qozǵady.
2020 jyldyń qarashasynan bastap qylmystyq jaýapkershilikten shetelde jasyrynyp júrgen kúdikti halyqarylyq izdeýge salyndy.
«AS Senim Business Group» JShS zańsyz áreketterinen zardap shekken azamattardyń Nur-Sultan qalasy polıtsııa departamentiniń tergeý komıtetine Beıbitshilik kóshesi 19 mekenjaıy nemese 7 (7172) 71-62-22, +7 771 060 0900, 102 nómirleri boıynsha júgine alady.
