Elordada kólikterdiń órtenýi kóbeıgen
Jyl basynan beri Astana aýmaǵynda 445 órt tirkeldi. Bul týraly elordadaǵy kommýnıkatsııalar qyzmetindegi órt qaýipsizdigi máselesine arnalǵan brıfıngide málim boldy, dep habarlaıdy QazAqparat tilshisi.
«Jeke turǵyn úılerde gaz qondyrǵylaryna balalardy jaqyndatpaý mańyzdy. Sonymen qatar, gaz peshteriniń qaýipsizdigine nazar aýdarý kerek. Atap aıtqanda, elorda aýmaǵynda gaz qondyrǵylaryn teksere alatyn 45 mekeme bar. Bul turǵyda qala turǵyndary «QazTransGaz Aımaq» AQ Astana óndiristik fılıalynynan tıisti konsýltatsııa alsa bolady», - dedi «QazTransGaz Aımaq» AQ Astana óndiristik fılıaly dırektorynyń birinshi orynbasary Erjan Balabekov elordadaǵy kommýnıkatsııalar qyzmetindegi brıfıngide.
Atalǵan kompanııa mamandary gaz jabdyqtaryn paıdalanýdyń qaýipsizdik erejelerin saqtamaý saldarynan jarylys nemese órt bolyp jatsa, onda gaz qondyrǵylarynyń ıeleri zań boıynsha jaýapqa tartylatynyn aıtty.
Sondyqtan turǵyndar mundaı jabdyqtardy paıdalaný kezinde gazdan ajyratý avtomatıkasy bar arnaıy quraldardy ornatýy kerek. Páterde gazdyń ıisi sezilse, jedel túrde barlyq gaz krandaryn jaýyp, bólmeni jeldetip, elektr quraldaryn paıdalanbaǵan jón.
