Elordada kólik kartasyn úıge jetkizip berý qyzmeti iske qosyldy
Nur-Sultanda oqýshylar men jeńildigi bar sanattaǵy jolaýshylar úshin kólik kartalaryn úıge deıin nemese Tastamat termınalyna deıin jetkizý qyzmeti iske qosyldy. Ol úshin ótinimdi elektrondy túrde berý qajet.
Kartany jetkizý aqysy: úıge deıin – 500 teńge, Tastamat termınalyna deıin 300 teńge.
Ótinimdi berý úlgisi:
1. transcard.kz saıtynda elektrondy ótinim qaldyrý qajet. Ol úshin talap etilgen barlyq pýnktti toltyryp, qajetti qujattardy júkteńiz.
2. Mektep nemese jeńildigi bar kartany shyǵarý úshin aqysyn tóleńiz. «Jiberý» batyrmasyn basqannan keıin, tólem jasaý paraqshasyna ótesiz.
3. Jetkizýge ótinim qaldyryńyz. Tólem jasaǵannan keıin, «Saıtqa oralý» batyrmasyn basyńyz. Siz kartany jetkizýge ótinim qaldyrýǵa arnalǵan paraqshaǵa ótesiz. Tapsyrys nómirin jáne SMS-pen keletin kodty engizý kerek. «Jiberý» batyrmasyn basqannan keıin, jetkizý saıtyna aýystyrylasyz.
4. Jetkizýdi rásimdeńiz. Jetkizý tásilin tańdap, osydan keıin mekenjaıyńyzdy toltyryp, qyzmet úshin aqyny tóleý kerek.
«Jetkizý qyzmeti tek mektep jáne jeńildigi bar kólik kartalary boıynsha iske asyrylady. Basqa sanattar boıynsha joǵary suranys týyndaǵan jaǵdaıda olardy da jetkizýdi qarastyramyz», - delingen habarlamada.
Aıta keteıik, kartany jetkizý qyzmeti elorda men onyń mańyndaǵy eldi mekenderdiń (Lesnaıa polıana, Qosshy, Qoıandy, Jibek Joly) turǵyndary úshin qoljetimdi.