Elordada qazaq kúresinen áskerıler arasynda alǵashqy álem chempıonaty ótedi

ASTANA. KAZINFORM – Astanada áskerı qyzmetshiler arasynda qazaq kúresinen alǵashqy álem chempıonaty ótedi. 

Tól sportymyzdan baıraqty básekeni Halyqaralyq áskerı sport keńesiniń (CISM) qoldaýymen QR Týrızm jáne sport mınıstrligi, Qorǵanys mınıstrligi jáne QAZAQ KURESI assotsıatsııasy uıymdastyrady.

Keıingi jyldary elimizde ulttyq sport túrlerine erekshe nazar aýdarylyp keledi. Jýyrda ǵana Memleket basshysy qol qoıǵan sport týraly jańa zańǵa sáıkes, elimizde resmı tirkelgen 11 ulttyq sport túri basym sport túrleri qataryna engizildi. Osylaısha, bıyldan bastap tól sportymyz zań aıasynda erekshe mártebege ıe bolyp, jańa deńgeıde damýǵa múmkindik aldy.

Ulttyq sportymyzdyń ishinde qazaq kúresiniń orny erekshe ekeni belgili. Sondyqtan da el astanasynda qazaq kúresinen áskerıler arasyndaǵy álem birinshiliginiń ótýi zańdylyq. Sonymen qatar tól sportymyz CISM kúntizbesine resmı túrde engen alǵashqy halyqaralyq doda bolyp otyr. CISM – álemniń 130-dan astam eliniń áskerı sportshylaryn biriktiretin iri halyqaralyq uıymdardyń biri.

Jahandyq doda Keńes odaǵynyń Batyry, qazaqtyń qaharman qyzy Álııa Moldaǵulovanyń 100 jyldyǵyna oraı uıymdastyrylyp otyr. Birinshilikke Qazaqstan, Túrkııa, Reseı, Ózbekstan, Tájikstan, Qyrǵyzstan, Belarýs, Iran, Italııa, Marokko, Mońǵolııa, Pákistan, Týnıs, Kamerýn, Venesýela, Gana, Qytaı, Brazılııa, Moldova, Nıgerııa, Shrı-Lanka jáne ózge de elderden sportshylar qatysady. Palýandar 16 salmaq dárejesinde júldelerdi sarapqa salady.

Sondaı-aq birinshilik aıasynda sheteldik qatysýshylar men tóreshilerge qazaq kúresiniń erejeleri men ádis-tásilderine qatysty oqý-ádistemelik semınarlar, sheberlik sabaqtary ótedi. Budan bólek UWW uıymynyń halyqaralyq nusqaýshysy Edmar Abdýllaev arnaıy oqytý kýrs júrgizedi.

Aıta keteıik, álem chempıonaty 14-15 tamyz kúnderi Astanadaǵy Qazaqstan jeńil atletıka kesheninde ótedi.

Buǵan deıin qazaq kúresinen eki dúrkin álem chempıony Muhıt Tursynov jastarǵa úndeý jasady.