Elordada karantınge qaramastan tilashar men úılený toıyn ótizgen

NUR-SULTAN. QazAqparat – Elordanyń bas sanıtar dárigeri qaýlysynyń qoldanysta bolýyna qaramastan qalalyq tamaqtaný nysandary men kóńil kóterý oryndary tarapynan sanıtarlyq talaptardy buzý jıilep ketken, dep habarlaıdy QazAqparat tilshisi.

Máselen, Nur-Sultan qalalyq polıtsııa departamentiniń málimetinshe, mobıldi toptyń ótken demalys kúngi reıd barysynda «El plaza» meıramhanasynda úılený toıy ótip jatqany anyqtalǵan. Toıǵa jınalǵan qonaqtardyń qatarynda qart adamdarmen qatar balalar da bolǵan. Sonymen qatar sol kúni Aqan seri kóshesi boıyndaǵy «Arna» meıramhanasynda 100-den astam qonaq tilashar toıynda bas qosqan.

«Meıramhana ıelerine qatysty jınaqtalǵan materıaldar QR Ákimshilik quqyq buzýshylyq týraly kodekstiń 425-babymen ákimshilik jaýapkershilikke tartý úshin ókiletti organǵa jiberildi. Demalys kúnderi quramynda Sanıtarlyq-epıdemıologııalyq baqylaý basqarmasynyń, ákimdiktiń ókilderi, volenterler men polıtsııa qyzmetkerleri bar mobıldi top 125 kásipkerlik nysanyn tekserip, karantın rejımin buzýdyń 32 faktisin anyqtady», - dep atap ótedi departamentten.

Sondaı-aq Nur-Sultan qalalyq polıtsııa departamenti elorda turǵyndaryna karantındi buzǵany úshin jaýapkershiliktiń bar ekendigin, sanıtarlyq normalar men áleýmettik ara qashyqty saqtaý qajettigin eskertedi.