Elordada karantın talaptaryn saqtamaǵandar jazalanady

NUR-SULTAN. QazAqparat - Elordanyń monıtorıngtik toptary kún saıyn kásipkerlik obektilerinde karantındik shekteýlerdiń saqtalýyn tekseredi. Kóńil kóterý oryndary karantındik shekteýlerge qaramastan sanıtarlyq talaptardy buzýyn toqtatar emes. Máselen, ótken táýlikte 6 nysanda karantın talaptary saqtalmaǵany anyqtaldy, dep habarlaıdy Nur-Sultan ákimdiginiń resmı saıty.

Esil aýdanynyń monıtorıngtik toby «Horeca» meıramhanasyn tekserý kezinde 60-qa jýyq adam bolǵanyn anyqtady, karantın jaǵdaıynda mundaıǵa jol berilmeıdi, óıtkeni áleýmettik qashyqtyq saqtalmaıdy. Sonymen qatar, mekeme jumys rejımin buza otyryp jumys istegeni belgili boldy.

«Monte Bianco Hotel Astana» qonaq úı-meıramhana kesheniniń karaoke-barynda da belgilengen jumys ýaqyty saqtalǵan joq, bul rette tekserý kezinde ishinde 40 adam bolǵany anyqtaldy.

Sondaı-aq turǵyndardan túngi ýaqytta «Derby pub» bary tynyshtyqty buzǵany týraly shaǵym tústi. Tekserý kezinde mekemede 8 adam bolǵan. Menshik ıesi túsinikteme berýden bas tartty, sol sebepti Esil aýdanynyń polıtsııa bólimine habar berildi.

Saryarqa aýdanynda ornalasqan «Let's play» kafesi men «Mıata» laýndj-barynda da karantın rejımi saqtalǵan joq. Baıqońyr aýdanyndaǵy «Corner 65» kompıýterlik klýbynda da osyndaı buzýshylyqqa jol berilgen.

Tártip buzýshylarǵa qatysty jınalǵan materıaldar ákimshilik sıpattaǵy sharalar qabyldaý úshin sanıtarlyq-epıdemıologııalyq baqylaý salasyndaǵy ýákiletti organǵa berildi.

Aıta ketý kerek, COVID-19 indetiniń tómendegenine qaramastan elorda epıdemıologııalyq jaǵdaıdy baǵalaý boıynsha «qyzyl» aımaqtan áli shyqqan joq. Sondyqtan qala turǵyndary men qonaqtary sanıtarlyq normalardy qatań saqtaýy kerek: maska rejımi, áleýmettik qashyqtyq, qol gıgıenasy. Azamattar ózderiniń de, ózgelerdiń de densaýlyǵyn saqtaý úshin koronavırýsqa qarsy vaktsınatsııadan ótýi kerek, óıtkeni ımmýndaý qaýipti vırýspen kúresýdiń jalǵyz tıimdi ádisi bolyp sanalady.