Elordada qandaı kásiporyndar men uıymdardyń jumysy jandanady
«Elordada azyq-túlik satpaıtyn bazarlardyń jumysy qaıtadan qalpyna keledi. Biraq olar mindetti túrde sanıtarlyq jáne dezınfektsııalyq talaptardy saqtaýy kerek. Bıznes-ortalyqtardyń, saqtandyrý kompanııalarynyń, advokattyq qyzmetterdiń, notarıýs, jyljymaıtyn múlik boıynsha agenttikterdiń de jumysy jandanady. Sporttyq nysandar oqý-jattyǵý protsesteri úshin 30 adamǵa deıingi arnaıy toppen jumys júrgize alady. Mádenıet jáne repetıtsııanyń jekelegen toptary da 30 adamǵa deıin jumys isteýine ruqsat. Halyqqa qyzmet kórsetetin tıpografııa, tigin atelesi, aıaq kıim sheberhanasy, hımııalyq tazartý men adamdar jınalmaıtyn ózge de nysandar jumysyn bastaıdy. Sonymen qatar Halyqqa qyzmet kórsetý ortalyqtarynyń jumysy jandanady. Biraq onda adamdardyń kezek saqtaýda sanıtarlyq talaptarynyń bári saqtalýy kerek», - dedi Baqtııar Máken OKQ-da ótken baspasóz máslıhatynda.
Qala ákiminiń orynbasary máselen ekinshi deńgeıli bankterde azamattar eki metrlik qashyqtyqty saqtaýy kerektigin aıtyp ótti.
«Tolyǵymen sanepıdemıologııalyq talaptardyń bárin saqtaý úshin mektepke deıingi uıymdar, balaqbaqshalar úshin arnaıy algorıtm ázirledik. Bilim ortalyqtary men úıirmeler jumysyn júrgizý úshin qyzmetkerler men balalardyń jaǵdaıyn qatań baqylaýda ustaýy kerek. JRVI belgisi bar balalar ondaı ortalyqtar men úıirmelerge kirgizilmeýi tıis. Balalar kabınetteri men korrektsııalar aldyn ala jazylý boıynsha jumys isteıdi», - dedi ol.
Baqtııar Máken sonymen qatar mektepterde, kolledjder men JOO-larda qashyqtan oqytý tártibi saqtalatynyn jetkizdi.
«Oqý jylynyń sońyna deıin qashyqtan oqytý júıesi kúshinde qalady», - dedi ol.