Elordada «Ǵumyrdarııa» estelik-esse kitabynyń tusaýkeseri ótti
ASTANA. KAZINFORM — Astanadaǵy «Dostyq» úıinde qoǵam jáne saıası qaıratker Ersultan Bekturǵanovtyń «Ǵumyrdarııa» estelik-esse kitabynyń tusaýkeseri ótti.
«Folıant» baspasynan jaryq kórgen bul týyndyda avtor óz ómirinen syr shertedi, ómirlik tájirıbesimen bólisedi. Baqyttyń kilti eńbekte ekenin dáripteıdi. Adam boıyndaǵy basty qasıetter adaldyq, eńbeksúıgishtik pen izettilikti negizgi qundylyqtar retinde kórsetip, oqyrmanyn izgilik jasaýǵa shaqyrady.
E. Ó. Bekturǵanov 1952 jyly Ózbekstanda dúnıege kelgen. Jambyl jeńil tamaq ónerkásibi tehnologııasy ınstıtýtyn (qazirgi M. H. Dýlatı atyndaǵy óńirlik ýnıversıtet)1976 jyly támamdaǵan. Mamandyǵy — ınjener-mehanık. Dıplomatııalyq akadamııany bitirgen, 1-synypty keńesshi degen dıplomatııalyq ataǵy bar.
Ol eńbek jolyn ózi bitirgen oqý ornynda ustaz bolýdan bastaǵan. Odan keıin on jyl Taldyqorǵan óńirinde saıası-ákimshilik qyzmettter atqaryp, tájirıbesi tolyǵa tústi. Elimiz Táýelsizdik alǵan jyldarda Jetisý óńirindegi ákimdiktiń eń birinshi qurylǵan appparatyn basqardy. Odan soń QR Syrtqy ister mınıstrliginiń hatshysy, Qazaqstannyń Germanııadaǵy konsýly, QR Prezıdenti ákimshiliginiń kadr saıasaty bóliminiń meńgerýshisi boldy. 2012 jyly qańtar aıynda Qazaqstan Respýblıkasy Parlamenti Májilisiniń depýtaty bolyp saılany, V–VI shaqyrylymdarda abyroıly qyzmet atqardy. Qazirgi kezde de jastarmen óziniń mol tájirıbesimen bólisýde, birneshe qoǵamdyq uıymdardyń múshesi, «QAZINDUSTRY» aktsıonerlik qoǵamynyń táýelsiz dırektory.
Qajyrly eńbegi memleket pen qoǵam tarapynan joǵary baǵalanyp, «Eren eńbegi úshin» medelimen, «Qurmet», «Parasat» ordenderimen marapattalǵan. Eki ret Prezıdenttiń alǵysyn alyp, omyraýyna «Altyn barys» belgisin taqty. Ol memlekettik qyzmet salasynyń ardageri, Qazaqstan Respýblıkasynyń qurmetti sport qaıratkeri, Almaty oblysynyń qurmetti azamaty.
Tusaýkeser rásimin memleket jáne qoǵam qaıratkeri, Májilistiń V–VI shaqyrylymdarynyń depýtaty, general-leıtenant Abaı Tasbolatov júrgizdi.
Tusaýkeserde memleket jáne qoǵam qaıratkeri, «Qazaqstan orys, slavıan jáne kazak uıymdary» zańdy tulǵalar birlestiginiń tóraǵasy, general-leıtenant Vladımır Bojko, Parlamenttiń birneshe shaqyrylymynyń depýtaty, Senatorlar keńesiniń múshesi Qýanysh Sultanov, general-leıtenant Amangeldi Shabdarbaev, eks-kólik mınıstri ıÝrıı Lavrınenko, «Vympel» arnaıy bólimi quramynda bolǵan general Naǵashybaı Atshabarov, «Senimen bolashaq» respýblıkalyq ata-analar qoǵamdyq birlestiginiń negizin qalaýshy Nurken Asanov, qoǵam qaıratkeri Baqyt Demeeva, Senat depýtaty Sultan Dúısembınov, QR OSK tóraǵasynyń orynbasary Muhtar Erman, memlekettik qyzmettiń ardagri Esenqul Safýanı, «Egemen Qazaqstan» gazetiniń bas redaktory Ǵabıt Músirep, Ózbekstannyń Qazaqstandaǵy elshiliginiń keńesshisi Rýstamjan Hakımov, «Uly ǵasyr» qorynyń bas dırektory Bolatbek Ysqaqov, fızıka-matematıka ǵylymdarynyń doktory, QR memlekettik syılyǵynyń laýreaty, akademık Rátbaı Myrzaqulov, ekonomıka ǵylymdarynyń doktory, akademık Oraq Álıev jáne taǵy basqalar kitap jaıly pikir bildirdi.
— Kitaptyń ereksheligi — avtorlyq egoızm degen joq. Kóbinese ózin emes, birinshi planǵa qoǵamdy, sol elimizdiń tarıhyn jáne qandaı jaǵdaıda, qandaı sátte, kimmen qalaı jumys istegeni týraly aıtylady, — Muhtar Erman.
Prezıdent janyndaǵy Ulttyq quryltaıdyń múshesi, «Ózbek etnomádenı ortalyǵy» qoǵamdyq birlestiginiń tóraǵasy Sherzod Pýlatov pen QR Parlamenti Senatynyń depýtaty Alısher Satvaldıev Ersultan Bekturǵanovqa «Qoǵam qaıratkeri-Jamoat arbobı» altyn medalin tapsyrdy.
Shara barysynda jınalǵan qaýym kitaptyń mazmuny men kórkemdik deńgeıin joǵary baǵalady.
Osyǵan deıin sheteldegi qazaq aqyn-jazýshylaryna arnalǵan 9 kitaptyń tusaýkeseri ótkenin jazǵan edik.