Elordada fýtbol jankúıerleri janjal shyǵardy: kináli qamaýǵa alyndy

ASTANA. KAZINFORM – Astanada fýtbol jankúıerleri jappaı tóbelesti, janjaldyń jelide taraǵan vıdeosy sotta qaraldy. 

Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty «Astana-Arena» stadıonynyń janynda tóbeles shyǵaryp, qoǵamdyq tártipti buzǵan D.-ǵa qatysty isti qarady. Onyń áreketi Ákimshilik quqyq buzýshylyq týraly kodekstiń 434-baby 1-bóligi boıynsha saralanǵan.

— Sotta D. tóbelestiń mán-jaıyn rastady, kinásin moıyndap, ókinip, janjaldy betperde kıgen adamdardyń (múmkin fýtbol klýbynyń jankúıerleri) shyǵarǵanyn eskerýdi surady. Sot quqyq buzýshylyqtyń mán-jaıy oqıǵa ornynan túsirilgen beınejazbamen rastady, — deıdi qalalyq sottan.

Ákimshilik quqyq buzýshylyq týraly kodekste, atalǵan jaǵdaıda 434-baby 1-bóligine sáıkes 20 AEK mólsherinde aıyppul nemese 5 táýlikten 15 táýlikke deıin qamaýǵa alý kózdelgen.

— Sot 10 táýlik túrindegi qamaýǵa alý sharasyn qoǵamǵa teris áser etetin jáne qoǵamǵa qurmetsizdik kórsetýge baǵyttalǵan, orynsyz minez-qulyqta kórsetilgen jasalǵan is-árekettiń dárejesi men sıpatyn eskere otyryp taǵaıyndady, — delingen sot qaýlysynda.

Qaýly zańdy kúshine engen joq.

Eske salaıyq, mamyrda Mańǵystaýda mektep oqýshylary tóbelesip, bir bala aýrýhanaǵa tústi. 

Sondaı-aq osy aıda Almatyda jappaı tóbeles bolyp, eki adam pyshaq jaraqatyn alǵan edi. 

Odan bólek Aqtaýda bir top jigit kóshede tapa-tal túste tóbeles shyǵardy.