Elordada feldegerlik qyzmet mamandary marapattaldy
1991 jyly 20 jeltoqsanda Qazaqstan Respýblıkasynyń memlekettik feldegerlik qyzmeti quryldy. 30 jyldyq tarıhy bar atalǵan qyzmettiń negizgi mindeti – memlekettik mańyzy bar jáne qupııa sanalatyn qujat, hat, hattama jáne basqa zattardy tıisti jerge jetkizý.
«16 jeltoqsan kúni elimiz Táýelsizdiktiń 30 jyldyǵyn atap ótti. Ata-babalarymyzdyń ǵasyrlar boıǵy armany oryndaldy. Qazirgi ómirdiń barlyq jetistikteri, ulttyq damýy ol Táýelsizdiktiń arqasy. Qazaqstan táýelsizdigin ala sala feldegerlik qyzmetti qurý kún tártibinde turdy. Osylaısha 1991 jyly 16 jeltoqsan kúni Qazaqstan óz Táýelsizdigin jarııalasa, araǵa 3 kúni salyp 20 jeltoqsan kúni mınıstrler kabınetiniń qaýlysymen sol kezdegi Baılanys mınıstrliginiń janynan memlekettik feldegerlik qyzmettiń negizi qalandy. 1993 jyly qańtarda Mınsk qalasynda TMD elderi ózara yntymaqtastyq týraly kelisimge keldi. Sol kelisimniń negizinde búgingi kúnge deıin memlekettik feldegerlik qyzmet jumysyn jalǵastyryp keledi. Osy jyldar aralyǵynda otandyq feldegerlik qyzmettiń damýyna arnalǵan 3 ret jıyn ótkizildi. Alǵash 1996 jyly Almatyda, odan keıin 2005 jáne 2014 jyly Astana qalasynda», - dedi QR memlekettik feldegerlik qyzmetiniń basshysy, feldegerlik qyzmet polvoknıgi Arnur Ikrambekov.
Onyń aıtýynsha, álemdegi feldegerlik qyzmettiń tarıhy bastaýyn XVIII ǵasyrdyń sońynan alady.
«Bizdiń qyzmet Táýelsizdik alǵaly el ekonomıkasynyń damýy men turaqtylyǵyna óz úlesin qosyp keledi. Bizdiń mamandar elimizge jáne elimizden memlekettik qundy ári qupııa sanalatyn mańyzdy qujattar men hattardy jetkizip keledi. Feldegerler qujattardan bólek, valıýta, altyn jáne basqa da baǵaly metaldardy jetkizýge jaýapty», - deıdi ol.
Bıyl feldegerlik qyzmet mamandary elimizge 12 myńnan astam qujat jetkizgen. Onyń 9 myńy elordaǵa kelgen.
«Sizderdi búgingi tól merekelerińizben shyn júrekten quttyqtaımyn. Sizderdiń merekelerińiz el Táýelsizdiginiń 30 jyldyǵymen sáıkes kelip otyr. Aldaǵy eńbekterińizge tabys tilep, elimizdiń órkendeýi qosar úlesterińiz mol bolsyn. 30 jyldyń ishinde sizder maqtanyshpen aıtatyn jaıttar jetkilikti, sizder Táýelsizdikpen birge jol júrip kelesizder. Feldegerlik qyzmettiń mamandary memleket qoıǵan tapsyrmany múltiksiz oryndap keledi. Ýaqyt pen jaǵdaıǵa qaramastan feldegerlik qyzmet kez kelgen jerge korrespendentsııany shuǵyl ári bútindeı jetkizip keledi. Taǵy bir aıtyp ótetin sát, sizderdiń jumystaryńyz týraly kópshilik bile bermeıdi. Degenmen sizderge júktelgen mindettiń memlekettik mańyzy baryn biz bilemiz», - dedi QR Prezıdent Ákimshiligi jalpy bólimniń meńgerýshisi Nurdáýlet Tóleev.
Sondaı-aq, shara barysynda feldegerlik qyzmette eńbek etip, atalǵan salanyń damýyna úles qosqan ardager jáne qatardaǵy qyzmetkerler marapattaldy.
