Elordada Dına Nurpeıisovanyń 160 jyldyǵyna arnalǵan qorytyndy kontsert ótti
Atalǵan bilim ordasynyń rektory, Qazaqstannyń Eńbek Eri, Álem ártisi Aıman Musaqojaeva óz sózinde Dınanyń ómir joly men ulttyq mýzykany damytýdaǵy aıryqsha róli týraly tolymdy oı qozǵady.
Uly kúıshi Qurmanǵazynyń daryndy shákirti, ótken ǵasyrdyń orta tusynda erekshe qabileti arqyly esimi búkil Keńes odaǵyna keńinen taralǵanyn jáne qazaqtyń aspaptyq mýzykasynyń tamasha dástúrin keıingi býynǵa tabys etken ǵajaıyp óner ıesi ekendigin atap ótti.
2021 jyly atqarylǵan jumystar týraly «Kúı anasy» qorynyń jetekshisi Tólegen Qýanyshev baıandap berdi.
«Shilde aıynyń basynda astanamyzda Dına Nurpeıisova eskertkishiniń ashylýy tarıhı oqıǵa boldy. Músinshi Baýyrqan Jalynnyń eńbegin joǵary baǵalaımyz. Bul – kúı anasyna jáne qazaq halqynyń ónerine kórsetilgen shynaıy qurmet. Uly kúıshiniń mereıtoıy joǵary deńgeıde ótýine zor úles qosqan Mádenıet jáne sport mınıstrligine, respýblıkalyq kompozıtorlar jáne kúıshiler odaqtaryna, Qazaq ulttyq óner ýnıversıtetine, Halel Dosmuhamedov atyndaǵy Atyraý ýnıversıteti men Dına Nurpeıisova atyndaǵy akademııalyq kolledjine jáne Óskemendegi Oralhan Bókeı atyndaǵy óner shyǵarmashylyǵy ujymdaryna jyl boıy atqarǵan qyzmetteri úshin alǵysymyz sheksiz. «Jalǵyzdyń úni shyqpas» demekshi, osy jumystyń basy-qasynda júrip qoldaǵan, aǵalyq aqyl-keńesterin bergen memleket jáne qoǵam qaıratkerlerine rızashylyǵymyzdy bildiremiz», - dedi T.Qýanyshev.
Osy keshke qurmetti meıman retinde Almatydan arnaıy shaqyrylǵan dombyrashy, kompozıtor, kúıshi, Qazaqstannyń eńbek sińirgen qaıratkeri Shámil Ábiltaev úlken qoshemetpen sahnaǵa kóterilip, Qurmanǵazynyń «Aqbaı», Dınanyń «Ásem qońyr» shyǵarmalaryn jáne halyq kúıi «Aqsaq qulandy» tartyp berdi.
Qazaq ulttyq óner ýnıversıtetiniń ulttyq aspaptar orkestri jáne jeke dombyrashylar Dınanyń onnan astam kúılerin oryndap, kórermenderdiń kóńilinen shyǵa bildi. Batys Qazaqstan oblysy, Jańaqala mýzyka mektebiniń túlegi, qazir Qazaq ulttyq óner ýnıversıtetiniń birinshi kýrs stýdenti, respýblıkalyq konkýrstardyń laýreaty, Dınanyń altynshy urpaǵy Muqaǵalı Rysqalıev kúı tartyp, kórermenniń ystyq yqylasyna bólendi.
QR Jazýshylar odaǵynyń múshesi, aqyn Aıbatyr Seıtaqtyń kúıshige arnalǵan «Kúı ónerin bar álemge tanytty» atty óleńi oqyldy.
Óner keshin QR eńbek sińirgen qaıratkeri Janǵalı Júzbaı júrgizip otyrdy.
Jas óner ıelerin yntalandyrý maqsatynda «Kúı anasy» qorynyń atynan atalǵan oqý ornynyń janyndaǵy kolledjdiń úshinshi kýrs stýdenti Álisher Bekbaýulyna arnaıy tapsyryspen jasalǵan dombyra syıǵa tartyldy. Sondaı-aq keleshekte ýnıversıtet murajaıynda uly kúıshige arnalǵan bólim ashylady degen nıetpen bilim ordasyna Dınanyń kólemdi portreti tabys etildi. Oqý ornynyń kitaphanasyna D.Nurpeıisova týraly bıyl jaryq kórgen kitaptar syılyq retinde berildi.
Jınalǵandar tamashalaǵan kórmede Dına Nurpeıisova týraly jazylǵan maqalalar, tanymal óner ıeleri bergen suhbattar, kitaptar jáne 200-ge jýyq qujat derekteri oryn aldy. Sonyń ishinde buryn jarııa bolmaǵan Dınanyń shóberesi Tólegen Qýanyshevtiń jeke muraǵatyndaǵy málimetter de kópshilik nazaryna usynyldy. Elorda irgesindegi Qosshy kentiniń turǵyny, dombyra aspabyn jasaýdyń sheberi Nurjan Dilmanovqa jeke týyndylaryn halyqqa tanystyrýyna múmkindik jasaldy. Ol da arnaıy kórme uıymdastyryp, talapqa saı, óz qolymen jasaǵan otyz shaqty dombyrasyn alyp keldi. Túrli qalyptaǵy aspaptardyń tabıǵı únin estip kóremin degenderge dombyrany shertip qaraýyna ruqsat berildi.
Keshtiń qurmetti qonaqtary, qoǵam jáne óner qaıratkerleri Irak Elekeev, Zeınolla Alshymbaev, Serik Ábdirahmanov, Muhambet Kópeı, Qaırat Sarybaı, Oraq Álıev, Ýálıhan Qalıjanov, Qaırat Baıbosynov, Aıtqalı Jaıymov, Aıtjan Toqtaǵan, Bekbolat Baısaǵatov, Turar Álipbaev, Kerim Pirimqulov osyndaı is-sharany joǵary deńgeıde ótkizgen ýnıversıtet ujymyna rızashylyǵyn bildirdi.
«Dına ájemiz tabıǵaty erekshe daryn ıesi bolǵan. Onyń shyǵarmalary adamǵa kúsh-jiger, rýh beredi. Jastardy ulttyq tárbıege baýlýda, otansúıgishtik sezimderin arttyrýda Dınanyń keremet kúıleriniń róli óte zor. Mundaı mádenı is-sharalar elimizdiń barlyq óńirinde, oqý oryndarynda jyl saıyn turaqty ótip tursa, táýelsiz elimizdiń óskeleń urpaǵyn qalyptastyrý isinde taǵylymy mol bolar edi», - dedi I.Elekeev.
Elorda turǵyny, zeınetker Sáýle Haırýllına: «Bul kontsertten tamasha áser aldyq. Ýnıversıtet ustazdary men stýdentteriniń dombyra tartýy ǵajap eken. Mundaı dárejede kúı tartqan adamdardy kórmep edim. Qazaqta «Dombyranyń qulaǵynda oınaıdy» degen sóz bar. Shyn máninde, ulttyq aspabymyzdy joǵary deńgeıde meńgergen jandardy kórip, kóńilimiz ósti. Osy oqý orny aldaǵy ýaqytta ónerli jastardy tárbıelep shyǵara beretinine kózimiz jetti. Halqymyzdyń rýhanı baılyǵy órken jaıa bersin», - dep óz oıyn bildirdi.
Eske sala keteıik, budan buryn Batys Qazaqstanda Dına Nurpeıisova atyndaǵy kúı baıqaýynyń jeńimpazdary anyqtalǵanyn jazǵan bolatynbyz.
