Elordada bir oqýshyny mektepke daıyndaý úshin qansha teńge jumsalady?
Al, qazir ata-ana, ásirese, qaladaǵy ata-ana ár balasyn mektepke jeke-jeke daıyndaıdy. Bul bir jaǵynan eldegi áleýmettik jaǵdaıdyń jaqsarǵany, onyń ústine, mektepterdegi jańa tártiptermen baılanysty desek, ekinshi jaǵynan otbasynda bir ul, bir qyzdan basqa sábı úni estilmeı qalǵan bir kezdegi demografııalyq keleńsizdiktiń belgisi de shyǵar.
Biraq, bizdiń búgingi aıtpaǵymyz demografııalyq ahýal emes. Búgingi áńgime - balany mektepke daıyndaýdyń arıfmetıkasy týraly bolmaq. Sondyqtan, 1 qyrkúıek qarsańynda, Astana qalasynda bir oqýshyny mektepke tas-túıin etip daıyndaý úshin neshe teńge ketedi degen másele tóńireginde áleýmettik taldaý jasaýdy jón kórdik.
Eń aldymen, balanyń boıyna bilim sińiretin - kitaby. Bilim jáne ǵylym mınıstrligi bul rette oqýshylardyń 98 paıyzǵa jýyǵy mektep baǵdarlamasyndaǵy kitappen tolyq qamtylǵanyn aıtyp otyr. BǴM mektepke deıingi jáne orta bilim berý, aqparattyq tehnologııalar departamentiniń dırektory Jańyl Jontaeva 10 tamyzdan bastap 1-synyp oqýshylaryna jańa oqý jylynyń kitaptary úlestirile bastaıdy degendi habarlaǵan bolatyn. «Barlyq mektep basshylary, qalalyq, oblystyq, aýdandyq bilim bólimderiniń basshylary ata-analarmen birge 10 tamyzdan bastap 1-synyp oqýshylaryna oqýlyqtar tarata bastaıdy. 10 tamyz kúni 1-synyptyń oqýlyqtaryn alý úshin ata-analardy mektepke kelýge shaqyramyz. 11 tamyzda 2,3-synyptarǵa, 12 tamyzda 4,5-synyptarǵa, al 18 tamyzdan bastap 11-synyptyń balalaryna oqýlyq taratylady»,-degen edi shilde aıynyń sońynda jýrnalısterdiń suraǵyna jaýap bergen departament dırektory.
Qosh, memleket oqýshylardy túgeldeı kitappen qamtyp otyr delik. Biraq, Jańyl Jontaeva eskertkendeı: «memleket oqýlyqpen qamtamasyz etse de osy oqýlyqtarǵa qosymsha júretin dápterlerdi, atlas kartalaryn, ózge de qajettilikterdi satyp alyp berý ata-ananyń moınynda». Al, Astana dúkenderindegi baǵalarǵa saı, bir oqýshyǵa qajetti kantstaýarlaryn alyp berý úshin ortasha 9000 teńge ketedi. Bul 9 000 teńge ishine joǵaryda aıtqan atlas kartalar, qosymsha dápterler men jaı dápterler, qalam, qaryndashtyń quny kiredi.
Al, osy kitap-quraldaryn salatyn sómkelerdiń ortasha baǵasy elorda dúkenderinde 5000 teńgeden bastalyp, 25 000- 27 000 teńgege deıin barady. ıAǵnı, sapasy jaqsyraq, sáni de kelisken sómkelerdi 8000-9000 teńgege satyp alýǵa bolady.
Endi, kıim-keshek qunyna toqtalsaq. Jalpy, mektepterdiń ózi talap etetin arnaıy formany tiktirý úshin shamamen 15000-20000 teńge ketedi. Al, eger, mektep formasy bolmasa, elordadaǵy ata-analar ul balasyna kostıýmdi ortasha eseppen 6000 teńgege, shalbardy 7000 teńgege, aq jeıdelerin 6000 teńgege satyp alady eken. Er balalarǵa arnalǵan sapaly sporttyq kıimniń baǵasy 10000-17000 teńge aralyǵynda.
Qyz balalarymyzdyń kıimderine de sapasy men satylyp turǵan ornyna qaraı ártúrli baǵa belgilengen. Qyz balanyń beldemshesin Astana dúkenderinde 5000 teńge jáne odan da joǵary baǵaǵa satyp alýǵa bolady. Aq jeıdeleri 6000-7000 teńgeden satylsa, sport sabaǵyna arnalǵan formany 10 000 teńgeden bastap 17 000 teńge aralyǵynda satyp alýǵa bolady.
Al, oqýshylardyń aıaq kıimderi sapasyna qaraı 5000 teńgeden bastalyp tipti 20-30 myń teńgege deıin barady. Al, qarapaıym halyqtyń qaltasy kóteretin baǵa shamamen 8000 teńge eken. Biraq, qazir balańyzǵa bir aıaq kıim az bolady, sebebi, qazir qala mektepteriniń barlyǵy ekinshi aıaq kıim talap etedi. Sondyqtan, bir balasyna qos aıaq kıim alatyn ata-ana jeńildik talap etip, 5000-8000 teńgege bir maýsymǵa shydaıtyn aıaq kıim satyp alady.
Osylaısha, Astananyń dúkenderi men bazarlaryndaǵy baǵany bile otyryp, bir balanyń mektepke kerek-jaraǵy shamamen neshe teńge bolatynyn ózimizshe eseptedik. Sóıte kele, ata-ana Astana qalasynda bir oqýshy balasyn bastan-aıaq kıindirip, kerek-jaraǵyn tolyq alyp berý úshin eń keminde 50 000 teńge jumsaıtynyn anyqtadyq. Ata-analardyń aıtýynsha, dúnıeni eń arzan baǵamen aldym degen kúnniń ózinde osynsha qarajat ketedi eken.
