Elordada bıyl energetıka salasyna 100,8 mlrd teńge jumsalady

ASTANA. KAZINFORM – Bıyl Astana qalasynyń energetıka salasyndaǵy jumystaryna 100,8 mlrd teńge jumsalady. Bul týraly qalalyq Energetıka basqarmasynyń basshysy Nurlan Kópeshov málimdedi. 

– Barlyǵy 100,8 mlrd teńge josparlanǵan. Onyń 70,3 mlrd-y — respýblıkalyq bıýdjetten, 8,2 mlrd-y — jergilikti bıýdjetten bólinedi. 22,5 mlrd-y — óz qarajatymyz (basqarmaǵa qarasty kásiporyndardyń qarajaty – red.), - dedi basqarma basshysy. 

Sondaı-aq ol bul qarjynyń qaı baǵyttarǵa jumsalatynyn atap kórsetti. 

– Energııa kózderi salasynda 36 jobaǵa 39 mlrd teńge, jylý jelileri salasynda 21 jobaǵa 22,1 mlrd teńge, elektrmen qamtý salasynda 17 jobaǵa 18,1 mlrd teńge, gaz tartý salasynda 15 jobaǵa 20,2 mlrd teńge qarastyrylǵan, - dedi Nurlan Kópeshov. 

Búgin qalalyq máslıhatta «Elordany energııamen qamtamasyz etý jáne jylýmen jabdyqtaýdy damytý perspektıvalary men qazirgi jaǵdaıy» máselesi boıynsha qoǵamdyq tyńdaý ótti. Onda Energetıka basqarmasynyń basshysy, «Astana – Energııa» AQ, «Astana – óńirlik elektrjelilik kompanııa» AQ, «Astana – Teplotranzıt» AQ-nyń basshylary energııa kózderin keńeıtý, jylý jelilerin salý jáne elektrmen jabdyqtaý jelilerin engizý, sondaı-aq turǵyn alaptarǵa gaz berý máseleleri boıynsha baıandama jasady.

Aıta keteıik, buǵan deıin elordada jylý energııasy boıynsha tarıf ózgerýi múmkin ekenin jazǵan edik.