Elordada «BaiQymyz» ulttyq taǵamdar gastrofestıvali ótip jatyr
ASTANA. KAZINFORM — Gastrofestıvaldi uıymdastyrýshylar halqymyzdyń dástúrli taǵam mádenıetin, sonyń ishinde qymyz óndirý dástúrin jańǵyrtyp, halyqaralyq deńgeıge ilgeriletý maqsatyn kózdep otyr.
Búgin elordadaǵy «Qazanat» ıppodromynda elimizde alǵash ret «BaiQymyz — baptalǵan qymyz ulttyq taǵamdar gastrofestıvali» atty iri kólemdegi mádenı-agrarlyq is-shara bastaldy.
Eki kún boıy ótetin sharaǵa 50-60 myń adam keledi dep kútiledi. Baıqaýǵa ár óńirden 50-den astam qymyz óndirýshi qatysyp jatyr.
Uıymdastyrýshylar festıvaldi Oktoberfest sııaqty halyqaralyq úlgidegi mádenı-agrarlyq brendke aınaldyrýdy kózdep otyr.
Qonaqtar eki kún boıy túrli qymyzdan dám tatyp, jylqy kórmesin tamashalap, etno-mádenı baǵdarlamalardy tamashalaı alady.
— Búgin bizde qymyz merekesi. Bul ulttyq taǵam men dástúrge qurmet, ár dastarqanda qymyz bolý kerek, búgingi festıval qymyzdy nasıhattaý maqsatynda uıymdastyrylyp otyr. Qymyz jarysynan bólek, mádenı is-sharalar ótip jatyr. Astana turǵyndary men qonaqtary, shetelden kelgen týrıster ulttyq sýsynnyń dámin tatyp, ózine unaǵan qymyzǵa daýys bere alady, — dedi «BaiQymyz» ulttyq taǵamdar gastrofestıvali ıdeıasynyń avtory, uıymdastyrýshy Jumajan Qaltaev.
Sondaı-aq qymyz óndirýshiler «Eń úzdik qymyz» ataǵy úshin talasady. Júlde qory — 45 mıllıon teńge (I oryn — 20 mln teńge, II oryn — 15 mln teńge, III oryn — 10 mln teńge).
Baıqaýdyń maqsaty — elimizdegi eń sapaly ári shıpaly qymyzdy anyqtaý. Negizgi maqsat — qymyzdy densaýlyq pen qonaqjaılyqtyń sımvoly retinde tanytý, sonymen qatar agrotýrızm men jylqy sharýashylyǵyn damytýǵa serpin berý.
Festıval aıasynda ótetin jylqy kórmesinde qazaqtyń baıyrǵy tuqymdary — Jaby, Kóshim, Qostanaı, Muǵaljar, Adaı jáne sporttyq baǵyttaǵy attar kópshilik nazaryna usynyldy.
Qolóner sheberleri er-toqym, qamshy, at ábzelderi sııaqty tarıhı buıymdaryn kórsetip jatyr. Sol sııaqty kelýshilerdiń buıymdardy satyp alý múmkindigi bar. Kórmeniń basty ereksheligi — biregeı buıymdar men jylqy aýktsıony.
Odan bólek, festıval aıasynda ǵylymı konferentsııa uıymdastyrylǵan. Ol jerde qymyzdyń emdik qasıetteri, jylqy sharýashylyǵy men dástúrli mal sharýashylyǵynyń damý bolashaǵy talqylanyp jatyr. Ǵylymı konferentsııada Germanııa, Reseı, Qyrǵyzstannan kelgen ǵalymdar, dárigerler, veterınarlar men kásipkerler baıandama jasap jatyr.
Qatysýshylar arasynda nemis jylqy sharýashylyǵy mamany Hans Tsolman, medıtsına ǵylymdarynyń doktory Baqytjan Bıimbetov, etnograf Aıgerim Musaǵajınova jáne basqa da sarapshylar bar.
Sheberlik sabaqtar barysynda qatysýshylarǵa qymyz daıyndaý, saqtaý, ashytý, sondaı-aq ony kapsýla túrinde óndirýdiń zamanaýı ádisteri tanystyrylyp jatyr. Sonymen qatar, teri ıleý, at ábzelderi men turmystyq buıymdardy jasaý boıynsha da qolóner sheberleri bilgenin úıretedi.
Sondaı-aq, baǵdarlama sheńberinde aýdaryspaq, jylqy úıretý, qumaı tazy saıysy, shalma salý syndy ulttyq sport túrlerinen jarys ótip jatyr. Sol sııaqty meshkeıler saıysy men jilik syndyrý sekildi erekshe sharalar festıval kórigin qyzdyrmaq.
Aıta keteıik, eń úzdik qymyzdy anyqtaý 4 krıterıı boıynsha baǵalanady. Sonyń biri — halyq daýysy, ıaǵnı kez kelgen adam QR kod arqyly úzdik qymyzdy tańdaı alady.
QR arqyly halyqtyń daýys berýi:
2025 jyl 19 shilde:
Saǵat 11:30 — 21-00
2025 jyl 20 shilde
Saǵat 10:00 — 15:00.
Bıyl maýsymda Bozoq qoryq-mýzeıinde «Qymyzmuryndyq» festıvali ótken edi.